Almatynyń «Qaırat» fýtbol klýby úsh aptalyq demalystan keıin ótetin halyqaralyq oqý-jattyǵý jıynynyń ornyn jáne josparlanǵan joldastyq kezdesýlerin jarııalady, dep habarlaıdy Egemen.kz.
Klýbtyń baspasóz qyzmeti Telegram-arnasynda habarlaǵandaı, 4 qańtar kúni tańerteń «Qaırat» Birikken Arab Ámirlikterine attanyp, 15 qańtarǵa deıin oqý-jattyǵý jıynyn ótkizedi.
«Jıynnyń basty maqsaty fýtbolshylardy ońtaıly fızıkalyq qalypqa keltirý jáne resmı matchtarǵa sapaly daıyndyq júrgizý», delingen klýb málimdemesinde.
Sondaı-aq almatylyq klýb eki joldastyq kezdesý ótkizetinin málimdedi. Atap aıtqanda,
9 qańtarda Ázerbaıjannyń «Neftchı» klýbyna qarsy,
14 qańtarda Horvatııanyń «Varajdın» komandasymen oınaıdy.
Aıta keteıik, juma kúni komanda klýb bazasynda jınalyp, bastapqy medısınalyq tekserýden ótýdi josparlap otyr.
Qazirgi tańda «Qaırat» Chempıondar lıgasynyń týrnırlik kestesinde 36-orynda tur. Almatylyq klýbtyń enshisinde bir ǵana upaı bar, ol Kıprdiń Pafos komandasymen ótken matchtaǵy teń oıyn (0:0).
Al qalǵan bes kezdesýde qazaqstandyq klýb jeńilis tapty.
Alda «Qaıratty» 20 qańtarda Belgııanyń «Brıýgge», sondaı-aq 28-nen 29 qańtarǵa qaraǵan túni Londonnyń «Arsenal» klýbtaryna qarsy matchtar kútip tur.