Gonkongta ATR 250 týrnıri aıaqtaldy. Bul jarysta elimizdiń eń úzdik tennısshisi Aleksandr Býblık tabysty óner kórsetip, óz jankúıerlerin taǵy bir qýantty.
Alǵashqy aınalymda bos bolǵan elimizdiń birinshi raketkasy odan keıin nıderlandtyq Botık van de Zandshýlp (ATR №75) pen qytaılyq Shan Szıýnchenge (№406) shań qaptyrdy. Bul básekelerdiń ekeýi de eki setten asqan joq. Jartylaı fınalda jerlesimizge biraz ter tógýine týra keldi. Ol alǵashqy sette amerıkalyq Markos Gıronǵa (№64) ese jibergenimen, odan keıingi setterdi óz paıdasyna sheshti – 3:6, 6:4, 6:2.
Fınalda Býblık álemniń jetinshi raketkasy ıtalııalyq Lorenso Mýzettımen kúsh synasty. 23 jastaǵy Apenın túbeginiń ókili 2024–2025 jyldar aralyǵynda Ýımbldon men Rollan Garrosta úzdik tórt oıynshynyń qataryna qosylǵan. Biraq bul joly óte keremet oınaǵan Aleksandr 7:6, 6:3 esebimen jeńiske jetti. Bul – Býblıktiń sporttyq mansabyndaǵy toǵyzynshy tıtýly. Osy tabysynyń arqasynda 250 upaı jıyp, 106 460 dollar kóleminde syıaqy aldy. Sonymen qatar A.Býblık óz mansabynda tuńǵysh ret álemdik reıtıngte TOP-10-dyqqa endi. Oǵan deıin erler arasynda elimizdiń birde-bir tennısshisi dál osyndaı bıik beleske kóterilgen joq edi.
* * *
Úndistannyń Bangalorynda uıymdastyrylǵan týrnırde Tımofeı Skatovtyń da qarqyny qýantty. Bastapqy básekelerde Nık Oberlıaıtner (Aýstrııa), Leong Mısýkı Veı Kan (Malaızııa), Ionash Foreıtekten (Chehııa) basym túsken otandasymyz jartylaı fınalda Arold Maıony (Fransııa) jolynan yǵystyrdy. Fınalda Skatov Pedro Martınespen (Ispanııa) kezdesti. ATR reıtınginde ózinen 139 saty joǵary turǵan tennısshige onyń áli jetpedi – 6:7, 3:6. Osy mejege jetkeniniń arqasynda Tımofeı úzdikter tiziminde birden 40 satyǵa joǵarylap, qazirgi kezde 195-orynda tur.
Aýstralııanyń Brısben qalasynda uıymdastyrylǵan, júlde qory 1 691 602 dollardy quraǵan týrnırge elimizdiń birneshe oıynshysy qatysqany belgili. Solardyń arasynyna eń úzdik kórsetkishke Anna Danılına qol jetkizdi. Serbııalyq Aleksandra Krýnıchpen juptasyp óner kórsetken ol jartylaı fınalǵa deıin jetti. Elena Rybakına shırek fınalda súrindi. Jarystyń áıelder synynda Arına Sobolenko (Belarýs) bas júldeni oljalasa, erler básekesinde Danııl Medvedevtiń (Reseı) mereıi ústem boldy.
Jasyl qurlyqtaǵy Adelaıda dep atalatyn eń kórikti qalalardyń birinde WTA 500 dodasy bastaldy. Onyń júlde qory 1 206 446 dollardy quraıdy. Irikteý synynda eki kezdesý ótkizgen Iýlııa Pýtınseva Torı Rassel (Aýstralııa) men Marııa Boýzkovadan (Chehııa) basym túsip, myqtylarmen kúsh synasý qurmetine ıe boldy.