Qazgıdromet 27-29 qańtar aralyǵynda kútiletin aýa raıy boljamyn jarııalady. Aldaǵy kúnderi ońtústik sıklon shyǵysqa qaraı jyljyp, elimizdiń basym bóligin qamtıdy. Respýblıkanyń ońtústigi men ońtústik-shyǵysynda qar aralas jaýyn-shashyn kútiledi, dep habarlaıdy Egemen.kz.
Sınoptıkterdiń boljamynsha, sıklon ótken aımaqtarda boran soǵyp, kóktaıǵaq qubylystary baıqalady. Al antısıklonnyń yqpaly eldiń soltústik-batysynda, soltústiginde jáne ortalyq bóliginde saqtalady. Bul aımaqtarda aıazdy, negizinen jaýyn-shashynsyz aýa raıy boljanǵan.
Batys jáne soltústik oblystarda túngi aýa temperatýrasy -20…-35°C shamasynda bolyp, aıazdy aýa raıy saqtalady. Keıinnen temperatýranyń joǵarylaýy kútiledi: batys pen soltústikte túnde -7…-20°C, kúndiz -2…-12°C bolady.
Al respýblıkanyń ortalyǵynda, shyǵysynda jáne ońtústik-shyǵysynda túngi temperatýra -3…-18°C, taýly aımaqtarda -15…-23°C, kúndiz 0…-7°C. Al taýly óńirlerde -8…-15°C shamasynda bolady.