Aqmola oblysynyń polısııa qyzmetkerleri Qosshy qalasynda esirtki jarnamasyn taratýmen aınalysqan adamdardyń qylmystyq áreketine tosqaýyl qoıdy, dep habarlaıdy Egemen.kz.
Tártip saqshylary aýmaqty tekserý barysynda turǵyn úılerdiń biriniń qabyrǵasynan tyıym salynǵan zattardy satatyn ınternet-dúkenniń ataýy jazylǵan jarnamany anyqtaǵan. Qatysýshylardyń zańsyz áreketteri beınebaqylaý kameralaryna túsip qalýynyń arqasynda olardyń jeke basy jedel anyqtaldy.
Atalǵan derek boıynsha Qazaqstan Respýblıkasy Qylmystyq kodeksiniń 299-1-baby 1-bóligi, ıaǵnı, esirtki quraldaryn, psıhotroptyq zattardy nemese olardyń analogtaryn, prekýrsorlardy nasıhattaý nemese zańsyz jarnamalaý boıynsha qylmystyq is qozǵaldy.
Qaraǵandyda esirtki kontrabandasymen aınalysqan stýdent 15 jylǵa sottaldy
Krımınaldyq polısııa júrgizgen jedel-izdestirý is-sharalarynyń nátıjesinde Astana qalasynyń eki turǵyny ustaldy. Belgili bolǵanyndaı, esh jerde oqymaıtyn jáne jumys istemeıtin jastar «ońaı tabys» týraly habarlandyrýdy áleýmettik jeliden tapqan. Olar atqarǵan jumysy úshin aqshalaı emes, esirtki zattary túrinde syıaqy alyp otyrǵan.
Qazirgi ýaqytta sotqa deıingi tergeý amaldary jalǵasýda jáne ustalǵandardyń osyǵan uqsas basqa da qylmystarǵa qatysy bar-joǵy tekserilip jatyr.
Aıta keteıik, buǵan deıin Petropavlda sıntetıkalyq esirtki satýmen aınalysqan 33 jastaǵy kúdikti ustalǵanyn habarlaǵan edik.