Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń depýtattary «Qazaqstan Respýblıkasynyń keıbir zańnamalyq aktilerine kúzet qyzmeti, turǵyn úı qatynastary jáne quqyq qorǵaý qyzmeti máseleleri boıynsha ózgerister men tolyqtyrýlar engizý týraly» zańdy qarady.
Talqylaýǵa múddeli memlekettik organdardyń, sonyń ishinde Ishki ister, Qorǵanys mınıstrlikteriniń, Bas prokýratýranyń, sondaı-aq beıindi vedomstvolar men uıymdardyń ókilderi qatysty.
Otyrys barysynda atap ótilgendeı, zańnyń negizgi maqsaty – kúzet qyzmeti sýbektileriniń qyzmetin jetildirý, qarý ıelerine qoıylatyn talaptardy kúsheıtý, sondaı-aq quqyq qorǵaý jáne arnaıy memlekettik organdar, azamattyq qorǵaý organdary qyzmetkerleri men áskerı qyzmetshilerdi turǵyn úımen qamtamasyz etý, turǵyn úı tólemderi tetikterin retke keltirý.
Zańmen, atap aıtqanda, turǵyn úı tólemderin usyný jáne júzege asyrý tártibin aıqyndaý boıynsha ókilettikterdi Úkimetke berý, azamattyq jáne qyzmettik qarý ıeleri úshin qosymsha mindetter engizý, kúzet qyzmeti sýbektileri úshin eseptilik ornatý, sondaı-aq áskerılendirilgen temirjol kúzetiniń quqyqtyq mártebesin bekitý qarastyrylady.
Budan bólek, memlekettik quqyqtyq statıstıka salasyndaǵy erejeler naqtylanady jáne quqyq qorǵaý organdary basshylarynyń kadrlyq sheshimder úshin jaýapkershiligi kúsheıtiledi.
Talqylaý qorytyndysy boıynsha usynylyp otyrǵan ózgerister memlekettik baqylaýdy kúsheıtýge, kúzet qyzmetteriniń sapasyn arttyrýǵa jáne quqyq qorǵaý júıesindegi kadr saıasatyn jetildirýge baǵyttalǵany atap ótildi.