Májilis depýtaty Danııa Espaeva Konstıtýsııalyq reformalar jónindegi komıssııanyń besinshi otyrysynda Ata Zańǵa usynylǵan ózgeristerdiń kólemi men tereńdigi tek qana jekelegen túzetýler aıasynda qalmaıtynyn, Konstıtýsııanyń jańa mátinin ázirleý qajettigine obektıvti túrde alyp keletinin aıtty, dep habarlaıdy Egemen.kz.
Onyń sózinshe, bastapqydaǵy parlamenttik reforma týraly bastama, sondaı-aq qoǵamdyq qatynastardyń transformasııasy, sıfrlandyrý men jasandy ıntellektinińdamýy Ata Zańdy keshendi túrde qaıta qaraýdy talap etedi. Komıssııaǵa eki myńnan astam usynys kelip tústi, olar qazirgi konstıtýsııalyq normalardyń jartysynan astamyn qamtıdy, bul tek jekelegen baptardy jańartý emes, memlekettiń basqarý qurylymynyń arhıtektýrasyn qaıta qaraý qajettiligin kórsetedi.
«Qazir aldymyzda Ata Zańnyń jekelegen bólimderin túzetý nemese tolyqtyrýdan asyp túsetin mindet tur. Bul – memlekettik basqarý júıesiniń, quqyqtar men bostandyqtardyń kepildikteriniń jáne bılik pen qoǵam arasyndaǵy ózara yqpaldastyq tetikterin tereń qaıta qaraý», dedi Danııa Espaeva.
Ol sondaı-aq bul tásil quqyqtyq aktiler týraly zańnama talaptaryna saı ekenin atap ótti: normatıvtik qujat mátininiń jartysynan astamy ózgergen jaǵdaıda onyń jańa redaksııasy qabyldanýy tıis. Osy logıka boıynsha, jańa Konstıtýsııany ázirleý zańǵa negizdelgen qadam bolyp tabylady.
Erlan Qarın: Jańa Konstıtýsııa Qazaqstannyń kemeldengen memlekettigin kórsetedi
«Jańa Konstıtýsııa memlekettiń turaqty damýy úshin berik quqyqtyq negiz bolýǵa tıis. Bul Qazaqstannyń memlekettiliktiń jańa kezeńine qadam basyp otyrǵanynyń ashyq jarııalanǵan jaýaby bolady», dep túıindedi Danııa Espaeva.