Men 86 jastaǵy zeınetkermin. Uzaq ǵumyr keship, talaı dáýirdiń kýási boldym. Bala kúnim soǵystan keıingi aýyr kezeńmen tuspa-tus keldi. Jastyq shaǵym eńbekpen, joqshylyqpen, biraq úmitpen órildi. Búgingi beıbit zamanǵa jetkenime sansyz shúkir etemin.
Halqymyzdyń birligi – eń qymbat qazyna. Dinimizdi, tilimizdi, salt-dástúrimizdi joǵaltpaı, aman saqtap kelemiz. Bul – aǵa býynnyń ǵana emes, keıingi tolqynnyń da ortaq jaýapkershiligi. Ásirese jastarymyzdyń bilimdi, parasatty, ultjandy bolyp óskeni asa mańyzdy.
Bilim – zaman talaby. Qaı dáýirde de oqyǵan, izdengen adam ozady. Qazir «Oqý ınemen qudyq qazǵandaı» deıtin sózdiń máni tipti tereńdeı tústi. Sóz tórkinin túsinip ósken bala erteń elge tirek bolary anyq. Sondyqtan jastarymyz bilimge umtylyp, jaqsy men jamandy aıyra bilse eken deımin.
Meniń tilegim – qyzdarymyz ıbaly, uldarymyz namysty bolsyn. Olar – ulttyń aınasy. Ata-ana balasyn meıirimmen tárbıelep, úlkendi syılaýǵa, kishini qurmetteýge baýlysa, qoǵam da túzeledi. «Áke kórgen oq jonar, sheshe kórgen ton pisher» degen sóz beker aıtylmaǵan.
Qazirgi zamanda aqparat kóp. Teledıdar men túrli áleýmettik jeli arqyly neshe túrli dúnıeni kóremiz. Sonyń bárine eliktemeı, ulttyq bolmysymyzdy saqtap qalý – basty mindet.
Jastardyń júregi taza, nıeti durys bolsa, el de ósedi. Jigerli, qaısar azamattar el birligin nyǵaıtyp, tatýlyqty tý etedi. Eldi izdegen erler kóbeısin.
Meniń bar tilegim – Otanymnyń amandyǵy. Dastarqanymyz berekeli, shańyraǵymyz shattyqtan ajyramasyn. Qıyndyqta qaıyspaı, qýanyshta tasymaı, birligimizdi saqtaı bileıik.
Úmit DÚISENBEKOVA,
zeınetker