Qyzylordada bir kúnde eki birdeı emhananyń qurylysy bastaldy. Oblys ákimi Nurlybek Nálibaev, Densaýlyq saqtaý mınıstri Aqmaral Álnazarova, Májilisi depýtattary Murat Ábenov, Marhabat Jaıymbetov, Murat Ergeshbaev sondaı-aq zııaly qaýym ókilderi men el aǵalary qatysqan ıgi shara barysynda aldymen Tıtov shaǵyn aýdanyndaǵy 400 oryndyq jańa emhananyń irgetasy qalandy.
О́ńir basshysy jınalǵan jurtshylyqty jańa nysan qurylysynyń bastalýymen quttyqtap, óńirdiń densaýlyq saqtaý salasynda atqarylǵan aýqymdy jumysty saralap ótti.
Elimizdiń áleýmettik saıasattaǵy basym baǵyttarynyń biri – medısınalyq qyzmet sapasyn arttyrý. Qurylysy bastalyp jatqan jańa emhana Tıtov shaǵyn aýdanyndaǵy 40 myńnan astam turǵynǵa qyzmet kórsetedi. №5 qalalyq emhananyń jańa ǵımaratyn salýǵa 9 mlrd 823 mln teńge jumsalyp otyr. Aýmaǵy 9 myń sharshy metrge jetetin nysan zamanaýı talaptarǵa saı joǵary sapaly tehnologııalarmen jabdyqtalady.
«Bul – ana men bala ómirin saqtaýǵa, qazynaly qarttarymyzdyń densaýlyǵyn jaqsartýǵa baǵyttalǵan memleket qoldaýy. Aldaǵy ýaqytta da óńir halqynyń ómir sapasyn arttyrýǵa arnalǵan keshendi jumys jalǵasady», dedi oblys ákimi.
Qalanyń sol jaǵalaýynan salynatyn 500 kelýshige arnalǵan ekinshi emhana turǵyndarǵa ambýlatorııalyq-emhanalyq, dıagnostıkalyq, kúndizgi stasıonarlyq medısınalyq qyzmet kórsetetin kópsalaly mekeme bolady. Munda jalpy jáne akýsherlik-gınekologııalyq tirkeý, pedıatrııa, mamandandyrylǵan, shuǵyl medısınalyq kómek, profılaktıka, mektep medısınasy bólimderi qarastyrylyp otyr.
Jalpy, Syr óńirinde densaýlyq saqtaý ınfraqurylymyn jetildirý júıeli túrde jalǵasyp keledi. Osy baǵyttaǵy naqty kórsetkishterge toqtalsaq, 2022–2025 jyldary salaǵa 50 mlrd 100 mln teńge qarjy bólinip, 26 mlrd 400 mln teńgege 40 nysan salynyp, paıdalanýǵa berilgen. «Aýylda densaýlyq saqtaýdy jańǵyrtý» ulttyq jobasy aıasynda 10 mlrd 700 mln teńgege salynǵan 28 nysan halyq ıgiligine qyzmet etip keledi. Keıingi jyldary aýyl turǵyndaryna shuǵyl medısınalyq kómek kórsetýge arnalǵan 6 joba iske asyryldy.
QYZYLORDA