Memleketimiz balalarǵa alǵashqy deńgeıde keshendi medısınalyq kómek kórsetýdi damytýǵa kúsh salyp otyr. Sonyń bir dáleli, byltyr shilde aıynan bastap Medısınalyq-sanıtarlyq alǵashqy kómek (MSAK) uıymdarynyń 80%-ynda pedıatrııalyq bólimsheler quryldy.
Byltyr qyrkúıek aıynda Almatydaǵy balalarǵa shuǵyl medısınalyq kómek kórsetý ortalyǵynda jańa týǵan nárestelerdi kútip-baptaıtyn zamanaýı neonatologııa bólimshesi ashylǵan edi. О́ıtkeni keıbir sábıler aýyr jaǵdaıda dúnıege keledi de, shyr etip týǵan sátten bastap jansaqtaý bólimine túsedi. Aıtalyq, bir jylda osy ortalyqta 235 náreste emdelse, olardyń 52-sine týabitti damý kemistigine baılanysty shuǵyl operasııa jasaýǵa týra kelgen. Kishkentaı pasıentterdiń kóbeıe túsýi bólimshe múmkindikterin keńeıte otyryp, ozyq tehnologııalarmen jabdyqtalǵan jańa oryn ashýdy talap etedi. Sol turǵyda ortalyq bazasynda jańa týǵan nárestelerdi jansaqtaý jaǵdaıynda kútip-baptaýǵa arnalǵan mamandandyrylǵan bólimshe jasaqtaý kezek kúttirmeıtin máseleniń birine aınaldy.
Jaqynda ortalyq dırektory Álibek Smaǵulov ótken jyly atqarylǵan jumysqa esep bere kelip, jańadan ashylǵan neonatologııa bólimshesiniń jaı-japsary jóninde de jan-jaqty baıandady. Bólimshe bir mezette 16 sábıge kómek kórsete alady. Jedel túrde jetkizilgen nárestelerge jansaqtaýdan keıingi qarqyndy em-domǵa qosa, erte ońaltý qyzmeti júrgiziledi. Bólimshe ashylǵaly beri 103 jańa týǵan nárestege medısınalyq kómek kórsetildi.
Sondaı-aq byltyrdan beri ortalyqta jańa týǵan shaqalaqtan bastap 18 jasqa deıingi balalardy emdeıtin 12 oryndyq otorınolarıngologııa, jaq-bet hırýrgııasy bólimshesi táýlik boıy qyzmet kórsete bastady. Alǵashqy bes aıda 83 balaǵa shuǵyl, josparly kómek kórsetildi. Mundaı bólimshelerdiń ashylýy kórsetiletin medısınalyq kómektiń aıasyn keńeıtýge serpin berip otyr.
Byltyr 140,6 myńnan astam bala medısınalyq kómek aldy, bul aldyńǵy jylmen salystyrǵanda 22,5%-ǵa kóp. Josparly túrde elimizdiń ár shalǵaıynan kelgen 1500-den astam kishkentaı pasıentterge mamandan-dyrylǵan hırýrgııalyq, konservatıvti kómek kórsetildi.
Byltyr ortalyqta dárilik zattar men medısınalyq buıymdardy esepke alýdy qamtamasyz etetin gospıtaldyq farmasııa bólimshesi de ashylyp, halyqaralyq GPP standartyna saı ekendigin rastaıtyn sertıfıkat aldy. Jyl qorytyndysynda ortalyq eń joǵary akkredıtasııalyq sanatqa ıe bolyp, elimizdegi «Úzdik balalar stasıonary» dep tanyldy.
ALMATY