Bilim salasyndaǵy biregeı joba

Prezıdent Qasym-Jomart Toqaevtyń tapsyrmasymen bastalǵan «Keleshek mektepteri» ulttyq jobasy – bilim ınfraqurylymyn ózgertetin tyń bastama. Joba aıasynda elimizdiń túkpir-túkpirinde 460 myń oryndyq 217 jańa formatty mektep salyndy. Bul mektepter qazirgi zamannyń talaptaryna saı, ozyq bilim berý tehnologııalarymen, sıfrlyq ınfraqurylymmen jáne ınnovasııalyq oqý ádistemelerimen jabdyqtalǵan.

Jobanyń maqsaty – elimiz­diń barlyq óńirlerinde kez-kelgen balaǵa qoljetimdi jańa formattaǵy bilim berý uıym­daryn qurý. Joǵary sapaly bilim berý standarttaryn jappaı engizý arqyly, ár balanyń jan-jaqty damýyna jáne óz áleýetin tolyq ashýǵa teńdeı múmkindik jasaý.  Ulttyq joba balalardyń turǵylyqty jerine qaramastan, zaman talabyna saı jaǵdaıda sapaly bilim alý múmkindigin qamtamasyz etýge baǵyttalǵan.

El bolashaǵy megapolısten ǵana emes, aýyldan da bastalady.  Sondyqtan «Keleshek mek­tepterdiń» jartysyna jýyǵy, ıaǵnı 40%-y aýyldyq eldi mekenderde salyndy. Osylaısha, 200 myńnan astam aýyl balasy  zaman talabyna saı jaıly bilim berý ortasymen qamtamasyz etildi.

«Keleshek mektepterdiń» basty artyqshylyǵy – onda oqýshylarǵa qolaıly bilim berý keńistiginiń jasalýy. Bul mek­tepterdiń kólemi tıptik jobalarǵa qaraǵanda 15-20%-ǵa úlken, al tehnıkalyq jaraqtanýy jaǵynan 4 esege artyq.

Mektepterde robottehnıka kabınetteri, STEM-zerthanalar, horeografııa zaldary, kovorkıng aımaqtary, 4 sport zaly bar, zamanaýı pándik kabınetter, alǵashqy áskerı daıyndyq úshin arnaıy ashyq alańdar qarastyrylǵan. Barlyq mektep zamanaýı jı­hazdarmen jáne oqý qural-jabdyqtarymen jabdyqtalyp, árbir oqý kabıneti úshin qajetti tehnıkalyq quraldar jıyntyǵy qamtamasyz etilgen. Bunyń bar­lyǵy ustazdardyń jumysyn jeńildetip, oqýshylardyń bilim sapasyn kóterýge múmkindik beredi.

Ulttyq joba aıasynda salynǵan mektepterde qaýipsizdik júıeleri kúsheıtilgen. Mektepter zamanaýı beınebaqylaý jáne ǵımaratqa kirip-shyqqandardy qadaǵalaý júıelerimen qamtamasyz etilgen. Bastaýysh jáne joǵary synyptar bólek-bólek bloktarda oqıdy. Munyń barlyǵy balanyń qaýipsiz ári jaıly ortada bilim alýyna baǵyttalǵan.  Joba aıasynda jergilikti óndiristi qoldaýǵa erekshe basymdyq berildi. Bul baǵytta mektep qurylysyna qajetti materıaldar, mektep jıhazdary tek otandyq taýar óndirýshilerden satyp alynǵan. 

Eń bastysy, munda kez kel­gen balaǵa jaǵdaı jasalǵan, onyń ishinde erekshe bilim berý qajettilikteri bar balalarǵa da jeke sanıtarlyq bólmeler, keń kabınetter, jedelsaty, pandýstar, arnaıy belgiler, psıholog, logoped jáne defektolog kabınetteri qarastyrylǵan. Muǵalimder ınteraktıvti tehnologııalar men pándik zerthanalardy qoldana otyryp, ár oqýshynyń qyzyǵýshylyǵy men qabiletine qaraı tulǵalyq damýy­na jol ashady.

Bul mektepterde balalardyń boıynda ekologııalyq mádenıetti qalyptastyrý, qorshaǵan ortany qorǵaý, resýrstardy únemdi paıdalaný sııaqty jaýapkershilikti seziný daǵdylaryn damytýǵa erekshe mán beriledi.

Jobadaǵy negizgi basym­dyqtyń biri – oqýshylarǵa erte jas­tan kásibı baǵdar berý. Bastaýysh synyptarda túrli mamandyq ıelerimen kezdesýler, jobalyq aptalar uıymdastyrylady. 7-synyptan bastap tereńdetilgen beıindik oqytý, tálimgerlik júıesi jáne jeke bilim berý kýrstary engiziledi. Bul úderisti tıimdi úılestirý jáne basqarý maqsatynda «Mansap kompasy» atty arnaıy sıfrlyq platforma ázirlengen. Platforma oqýshylarǵa bolashaq kásibı baǵy­tyn jáne ári qaraıǵy bilim berý jolyn sanaly túrde tań­daýǵa kómektesedi.

Joba aıasynda barlyq mektepterde ınternet jelisine keminde 100 Megabıt jyldamdyqpen qosylý múmkindigi qamtamasyz etilmek. Mekteptiń ár qabatynda kitap qoımasy, oqý zaldary, elektrondy kitaphanalar jáne oqýǵa arnalǵan kovorkıng aımaqtary, jeke kitaphanalyq keńistik ornalastyrylǵan.

Oqýshylardy eńbekke baýlý jáne shyǵarmashylyq áleýetin damytý maqsatynda mektepterde ámbebap sheberhanalar men stýdııalar, sondaı-aq bastapqy kásibı bilim berýge arnalǵan arnaıy jabdyqtalǵan kabınetter qarastyrylǵan. Atap aıtqanda, tigin, aspazdyq, aqparattyq tehnologııa (IT), aǵash sheberhanasy jáne basqa da baǵyttar boıynsha oqý bólmeleri qajetti zamanaýı jabdyqtarmen tolyq qamtylǵan.

Keleshekte bul mektepter modeli elimizdegi barlyq jalpy bilim beretin mektepteriniń damýyna negiz bolmaq. Pysyqtalǵan standarttar, ádistemeler jáne basqarý sheshimderi búkil respýb­lıka boıynsha taratylady.