Almaty qalasyndaǵy Qoǵamdyq kommýnıkasııalar ortalyǵynda táýelsiz baıqaýshylardyń Aqparattyq shtaby men alty úkimettik emes uıymdy biriktirgen táýelsiz baıqaýshylar koalısııasynyń alǵashqy brıfıngi ótti. Kezdesý barysynda respýblıkalyq referendýmnyń ótý barysy, sondaı-aq elimizdiń óńirlerindegi baıqaýshylardyń jumysy týraly jedel aqparat usynyldy, dep habarlaıdy Egemen.kz.
Brıfıng barysynda referendým kúni aqparattyq ashyqtyqty qamtamasyz etý maqsatynda uıymdastyrylǵan shtabtyń jumysy tanystyryldy. Shtabtyń tikeleı efıri tańǵy saǵat 07:00-de bastalyp, daýys berý aıaqtalyp, aldyn ala qorytyndylar jarııalanǵanǵa deıin kúni boıy jalǵasatyny atap ótildi. Translıasııa Independ.kz aqparat agenttiginiń YouTube arnasynda, sondaı-aq Qoǵamdyq kommýnıkasııalar ortalyǵynyń resmı áleýmettik jelidegi paraqshalarynda júrgizilip jatyr.
Aqparattyq shtabtyń jumysy týraly baıandaǵan Rafael Gasanovtyń aıtýynsha, referendým barysyn baqylaý maqsatynda óńirlermen turaqty baılanys ornatylǵan. Daýys berý ýchaskeleri ashylǵan sátten bastap tikeleı qosylymdarǵa Almaty jáne Shymkent qalalary, sondaı-aq Jetisý, Soltústik Qazaqstan jáne Batys Qazaqstan oblystary (Oral qalasy) qosylǵan. Kún barysynda ózge óńirlermen de baılanys ornatý josparlanyp otyrǵany aıtyldy.
Mańǵystaý oblysynda 261 referendým ýchaskesi ashyldy
Onyń sózinshe, referendým barysy týraly aqparat óńirlik úılestirýshiler arqyly baıqaýshylardan turaqty túrde qabyldanyp otyrady. Barlyq málimetter resmı derekkózder negizinde monıtorıngten ótkizilip, tekserilgennen keıin shtabtyń aqparattyq alańdarynda jedel túrde jarııalanady. Bul tásil qoǵamǵa shynaıy ári tekserilgen aqparat usynýǵa múmkindik beredi.
«Aqparattyq shtabtyń negizgi mindeti – referendým barysy týraly qoǵamdy jedel ári naqty aqparatpen qamtamasyz etý, sondaı-aq múmkin bolatyn aqparattyq arandatýlar men jalǵan habarlamalardyń taralýyna jol bermeý», dedi Rafael Gasanov.
Brıfıngte aıtylǵan málimetke sáıkes, saǵat 10:00-degi jaǵdaı boıynsha táýelsiz baıqaýshylardyń Aqparattyq shtabyna zańbuzýshylyqtar, aqparattyq arandatýlar nemese jalǵan aqparattyń taralý faktileri týraly málimet túspegen.
Sonymen qatar óńirlik úılestirýshiler men baıqaýshylardyń aqparatyna súıensek, elimizdiń túrli aımaqtaryndaǵy daýys berý ýchaskelerinde azamattardyń belsendiligi joǵary.
Baıqaýshylar referendýmǵa qatysýshylardyń daýys berý quqyǵyn júzege asyrý úshin ýchaskelerge turaqty túrde kelip jatqanyn tirkep otyr. Bul óz kezeginde qoǵamnyń saıası belsendiligi men azamattyq jaýapkershiliginiń artyp kele jatqanyn kórsetedi.
IIM: Referendým kezinde eldegi jaǵdaı polısııanyń tolyq baqylaýyna alynǵan
Aıta ketý kerek, táýelsiz baıqaýshylar koalısııasy referendým barysynyń ashyqtyǵy men zańdylyǵyn qamtamasyz etý maqsatynda elimizdiń ártúrli óńirlerinde baqylaý júrgizilip jatyr. Aqparattyq shtab osy prosestegi negizgi úılestirý alańy retinde jumys istep, qoǵamdy jedel ári obektıvti aqparatpen qamtamasyz etýdi kózdeıdi.
Referendým barysyndaǵy jańartylǵan aqparattar men tikeleı efırdi Independ.kz aqparat agenttiginiń YouTube arnasynan, sondaı-aq Qoǵamdyq kommýnıkasııalar ortalyǵynyń áleýmettik jelilerdegi resmı paraqshalarynan kórýge bolady.