Búgin respýblıkalyq referendým aıasynda «Referendým – 2026» onlaın marafony ótip jatyr. Marafon barysynda Ortalyq kommýnıkasııalar alańynda respýblıkalyq referendýmnyń ótý barysyna qatysty resmı organdar ókilderi men sarapshylar ár eki saǵat saıyn tikeleı efırde aqparat berip jatyr, dep jazady Egemen.kz.
Bas prokýratýranyń Qoǵamdyq múddelerdi qorǵaý qyzmeti basqarmasynyń basshysy Bekjan Qaramanov búgingi mańyzdy is-shara aıasynda saǵat 13:00-degi jaǵdaı boıynsha zań buzýshylyqtar tirkelmegenin habarlady.
«Qazirgi ýaqytta daýys berý prosesi qalypty jaǵdaıda ótip jatyr. Prokýratýra organdaryna referendýmǵa qatysty eshqandaı ótinish túsken joq. Sondaı-aq sot organdaryna da talap-aryzdar engizilmegen. Qazirge deıin zańsyz saýalnama júrgizý nemese úgit júrgizgeni úshin jaýapkershilikke tartý faktileri tirkelgen joq. Biz zańdylyqtyń saqtalýyn qamtamasyz etý boıynsha jumysty jalǵastyramyz», dedi B.Qaramanov.
IIM: Referendým kezinde eldegi jaǵdaı polısııanyń tolyq baqylaýyna alynǵan
Sondaı-aq Ishki ister mınıstrliginiń resmı ókili Shyńǵys Álekeshev referendým qaýipsizdigin saqtaý úshin polısııa kúsheıtilgen rejımde jumys istep jatqanyn málimdedi.
«Ishki ister organdary referendýmnyń qaýipsiz ári tynysh ótýin qamtamasyz etý jumystaryn jalǵastyryp jatyr. Buǵan deıin habarlanǵandaı, barlyq jeke quram kúsheıtilgen rejımde qyzmet atqaryp jatyr. Kez kelgen jaǵdaıǵa jedel áreket etý úshin ár qala men aýdandyq polısııa bólimderinde mobıldi jedel toptar quryldy. Sonymen qatar referendým ýchaskeleriniń mańyndaǵy aýmaqtarǵa baqylaý kúsheıtildi. Ishki ister mınıstrliginiń jedel basqarý ortalyqtaryna qosylǵan beınekameralar arqyly jaǵdaı turaqty túrde baqylaýda. Qazirgi ýaqytta referendým ýchaskelerindegi jaǵdaı tynysh, qoǵamdyq tártip buzýshylyqtary tirkelgen joq», dedi Shyńǵys Álekeshev.