«Atyraý» fýtbol klýby da jekeshelenedi

«Atyraý» fýtbol klýbynyń dırektory Qýandyq Jaqııalıevtiń aıtýynsha, osyndaı sebeppen qarsylas komandalardy jergilikti stadıonda qabyldamaıdy. Jasyl jeıdeli komandanyń oıyny basqa qalada ótedi.

– Premer-lıga oıyndaryn ótkizý úshin stadıonda 3 myń oryn, jaryq bolýy qajet, basqa da talaptar bar. Osyǵan baılanysty «Munaıshy» stadıonynda kúrdeli jóndeý jumysyn bastaý kózdelip otyr. Al «Sýdremontnık» stadıony jattyǵý ótkizetin oryn retinde salynǵandyqtan, Premer-lıga oıyn­­­­daryn ótkizý talabyna sáıkes bolmaı tur. Bul stadıondy da talapqa sáıkestendirý jumystary qolǵa alynady. Osyndaı sebepter «Atyraý» komandasynyń aldaǵy eki-úsh aıdaǵy oıyndaryn Túrkistan qalasynda ótkizýge sheshim qabyldandy, – deıdi Q.Jaqııalıev.  

Fýtbol klýby bıylǵy chempıonat qarsańynda bas bapkerdi aýys­tyrdy. Eki ret bas bapker bolǵan Vıtalıı Jýkovskııdiń qandaı sebeppen ketkeni belgisiz. Endi komanda quramyn kúsheıtýge mán berilip otyr. Bas bapker  laýazymyna Vladımır Chebýrın tańdaldy. Ol 2009 jyly «Shahtıor» klýbyn el chempıonatynyń qola júldesine jetkizip, el kýboginiń fınalyna shyǵardy. Keıin «Oqjetpes» klýbyn qaıtadan Premer-lıgaǵa alyp shyqty. Onyń jetekshiligimen Lıtvanyń «Sýdýva» klýby úsh ret el chempıony atandy. Osy eldiń «Jalgırıs» klýby úsh márte el chempıony, eki márte Lıtva kýboginiń jeńimpazy atanǵan. Osyndaı jetistikteri úshin V.Chebýrın Lıtvada úsh ret «Jyl bapkeri» ataǵyn ıelengen.

Komanda jańa oıynshylarmen kelisimshart jasap jatyr. Sonyń biri – Belarýs quramasynyń oıyn­­shy­sy Egor Hvalko. Qorǵaýshy pozı­sııasynda oınaıtyn Egor – bıyl atalǵan klýbtyń sapyna qosylǵan alǵashqy legıoner. E.Hvalko buǵan deıin «Neman» (Belarýs), «Neman-2», «Dnıapro», «Arsenal Dzerjınsk», «Kıapaz» (Ázerbaıjan), «Tobyl» (Qazaqstan) komandalary quramynda oınaǵan.

Taǵy bir oıynshy – jartylaı qorǵaýshy Aleksandr Noıok. 2023–2024 jylǵy fýtbol maýsymynda «Atyraý» sapynda dop tepti. Endi eski ári jańa oıynshy retinde qaıta oralyp otyr.

Nıgerııalyq fýtbolshy Marıo Rabıý jartylaı qorǵaýshy pozısııasynda oınaıdy. Ol fýtboldaǵy kásibı mansabyn Italııanyń «Modena» klýbynda bastady. Keıin 2023 jyldyń qańtarynda «Vıterbeze» klýbyna, odan soń albanııalyq «Skenderbeý» klýbyna aýysqan. Byltyrǵy aqpanda «Aqtóbe» klýbynyń sapyna tartylyp, Premer-lıgada bes oıyn ótkizgen.

Osyndaı deńgeıi bar «Atyraý» fýtbol klýby satylýy múmkin be? Bul saýal jergilikti jankúıerlerdi tolǵandyryp júr. Oblystyq deneshynyqtyrý, sport jáne týrızm basqarmasynyń basshysy Nurbol Sydyqovtyń aıtýyna qaraǵanda, komandany jekeniń ıe­li­gine berý jospary bar. Osyǵan baı­lanysty klýbtyń naqty quny esep­telip, jekege satýǵa  konkýrs jarııa­landy. Klýbtyń bastapqy quny 175,6 mln teńgege baǵalanyp otyr. Naryqtyq quny – 250,8 mln teńge.

Fýtbol klýbyn satyp alatyn ınves­torǵa birneshe tarmaqtan tura­tyn mindetti oryndaý júktelip otyr. Birinshiden, ınvestor quny 1 mlrd teńgeden kem emes fýtbol akademııasyn ashýǵa tıis. Ekinshiden, 8 660 orynǵa eseptelgen «Munaıshy» stadıonyna ıelik etip, ınfraqurylymyn jetildirýi qajet. Úshinshiden, aldaǵy úsh jylda fýtbol ortalyǵynda keminde 1 myń balany tegin oqytýy kerek. Klýbtyń negizgi quramyna jergilikti tárbıelenýshilerdi tartý júktelip otyr. Tórtinshiden, jyl saıyn qarjylyq kiris-shyǵysqa qatysty aýdıtorlyq tekserý ótki­zip, memlekettik organdarǵa esep beredi. Besinshiden, klýbtyń osy kezge deıingi brendin saqtaıdy. Demek, tarıhı ataýyn, túsi men emblemasyn quzyrly organdardyń kelisiminsiz ózgertýge qatań tyıym salynady.

– Jekeshelendirý talapqa sáıkes júrgiziledi. Sonyń aıasynda «Atyraý» fýtbol klýbyn jeke ıelikke satý jóninde sheshim qabyldandy. Áleýmettik jelide klýbtyń jańa ıesi kim bolatyny jóninde jazba tarady. Alaıda klýbty kim satyp alatyny ázirge belgisiz. Klýbtyń jańa ıesi tenderdiń qorytyndysymen belgili bolady. Qazir áleýetti kásipkerlermen kelissózder júrgizilip jatyr, – dep málimdedi N.Sydyqov.

Atyraý oblysy