Kúnuzaq shaǵyn sheberhanasynda ýaqyt ótkizetin sýretshi qyzdyń shyǵarmashylyq baǵyty ózgeshe. Maıly boıaýdy kenep betinde oınatyp, kartına jazýdy emes, ertegi jelisi boıynsha ıllıýstrasııa salǵandy unatady. Kishkentaı balalarǵa arnalǵan keıipkerlerdiń keskin-kelbetin kelistire jazady. Keıde ózi de ertegi qurastyryp, ony túrli-tústi sýretpen árleıdi.
Kúrshim aýdanynyń týmasy Gúlsim Erkinqyzy О́skemendegi Q.Nurǵalıev atyndaǵy kolledjdiń sýretshi-dızaıner fakýltetinde bilim alyp, kásibı sýretshi bolyp shyqqan. Kolledj baǵdarlamasymen ǵana emes, ózi qosymsha izdenip, bilimin ushtaı túsken. Qazir jeke shyǵarmashylyǵymen qatar, sýret stýdııasynda shákirt tárbıeleıdi. Aıtýynsha, sıfrly dáýirdiń balalary oılaryn erkin jetkizedi, ózgeshe oılaıdy. Solardyń ishinen zamannyń suranysyna qaraı sýretshiler shyqsa eken deıdi. Talantty sýretshiniń oılaýy da, alysty boljaýy da ózgeshe eken. Appaq qaǵazdy shımaılaı otyryp, áńgimesin órbitken.
«Sýretshilikti jan-jaqty meńgerdim. Maıly boıaýmen kartına da jaza alamyn. Biraq búgingi jastarǵa, balalarǵa kerek dúnıemen shuǵyldanǵym keledi. Keıingi jyldary jastar arasynda komıks oqý sánge aınaldy. Aıtpaǵym, jastarǵa rýhanııatymyzdy komıks stılinde nasıhattasaq deımin. Moıyndaý kerek, tipti qazaq mektepterindegi oqýshylar oryssha sóıleıdi. Sebebi kishkentaıynan aqparatty orys tilinde sińirgen», deıdi jas sýretshi.
Aıtyp otyrǵan ıdeıasy oryndy bolǵanymen, bir adamnyń qolynan kelmeıdi. Ol úshin komanda bolyp jumys istelýi kerek. Qazaqtildi mýltfılm, qazaqtildi beınerolıkter daıyndaý qyrýar kúshti qajet etedi. Dese de, sýretshi Gúlsim shama-sharqynsha ertegi keıipkerlerin beınelep, baldyrǵandarǵa usynyp júr. Shaǵyn ertegiler jazyp, sýretpen kómkeredi. Alǵashynda ákesine degen saǵynyshtan qolyna qalam alyp, «Kishkentaı perishte» atty ertegi jazǵan. Oqıǵa jelisi boıynsha serııalyq sýretter salyp, kitapsha etip jınaqtaǵan.
Sýretshiniń oıy – ósip kele jatqan jastarǵa tól tilimizde ónim usyný. Onyń ózinde qandaı da bir esep úshin emes, shynaıy ónermen suranysty aqtaıtyndaı komıks kitaptar bolsa deıdi.
О́SKEMEN