Qonaev qalasynda «Taza Qazaqstan» baǵdarlamasy aıasynda ekologııalyq aksııa ótip, is-shara barysynda S.Seıfýllın kóshesiniń boıyna 3000 jasyl jelek egildi. Onyń qatarynda qaraǵaı, kók terek sekildi aǵash túrleri bar. Aksııaǵa 300-den astam adam jumylyp, bir kisideı atsalysty.
Kógaldandyrý naýqanyna qala ákimi Ashat Berdihanov, Almaty oblysy ákiminiń orynbasary Baqytnur Baqytuly, máslıhat depýtattary, QHA ókilderi, ákimdik mamandary, aqsaqaldar, eriktiler men jastar belsene qatysty.
«Memleket basshysynyń «Taza Qazaqstan» bastamasy ulttyq ıdeologııamyzdyń ajyramas bóligine aınaldy. Byltyr oblysta ekologııalyq aksııasy aıasyndaǵy is-sharalarǵa 849 myńnan astam adam, 8 800 kásiporyn men uıym qatysty. Nátıjesinde, 17 500 tonna qoqys jınalyp, 109 800 aǵash otyrǵyzyldy. Aldaǵy eki aı ishinde atalǵan aksııa barlyq aýdan men qalalarda ótedi», dedi B.Baqytuly.
Byltyr Qonaev qalasynda 30 myńǵa jýyq aǵash, 60 myńnan astam gúl egilgen eken. Bul jumys bıyl da jalǵasatynyn tilge tıek etken qala ákimi jýyrda qalaǵa kireberis tusta 7 myń aǵash egilip, jańa saıabaq ashylatynyn aıtty. Budan bólek, «Kóshpeliler qalashyǵynyń» aýmaǵyna 3 myń aǵash otyrǵyzylady. Jalpy, jyl sońyna deıin qaladaǵy jasyl jelek sany 20 myńǵa kóbeıedi.
«Qala kelbetin jaqsartý baǵytynda talaptar da kúsheıtildi. Endi jańa nysan salǵan árbir qurylys kompanııasy onyń aýmaǵyn mindetti túrde kógaldandyrýǵa tıis. Bul bastama aldaǵy ýaqytta Qonaevty jasyl ári jaıly qalaǵa aınaldyrýǵa jol ashady», dedi shahar basshysy.
Kógaldandyrý aksııalaryna jastar da belsene qatysýdy aınymas dástúrge aınaldyrǵan. «Paryz eriktileri» jastar qoǵamdyq birlestiginiń tóraǵasy Ádilet Aıtqazy mundaı ıgi isten jastar shet qalmaı, aldaǵy senbilikterde de belsendilik tanytanyna senim bildirdi.