«Prezıdent kitaptyń qoǵam damýyndaǵy aıryqsha ornyn únemi aıtyp keledi. Memleket basshysy: «Kitap oqyǵan urpaq ozyq oıly bolady. Sapaly ult osyndaı qundylyqtar arqyly qalyptasady», degen bolatyn. Búginde elimizde 12 myńǵa jýyq kitaphana bar. Bul salada 20 myńǵa tarta maman eńbek etip júr. Memleket basshysy jýyrda atap ótkendeı, kitap áli de bilim men tulǵalyq damýdyń mańyzdy qaınar kózi bolyp qala beredi. Osyǵan oraı qazirgi ýaqytta kitaphana isin jańǵyrtýǵa erekshe mán berilip otyr. Kitaphanalar avtomattandyrylǵan júıelerge kóship, jasandy ıntellekt tehnologııalaryn engizip, elektrondyq resýrstaryn damytyp keledi. Sonyń nátıjesinde azamattarǵa kitap qoryna qashyqtan qol jetkizý múmkindigi keńeıe tústi», dep jazdy A.Balaeva.
Mınıstrdiń aıtýynsha, memlekettik onlaın platformalarda da turaqty ósim baıqalady. Elektrondyq kitaphana resýrstaryn paıdalanýshylar sany 30 paıyzǵa artyp, 718 myń adamǵa jetken.
Jalpy, keıingi bes jylda onlaın oqyrmandar sany 4 mıllıonnan, elektrondyq formatta qaralǵan kitaptar sany 9 mıllıonnan asyp otyr.
«Eń bastysy, el ishinde kitap oqýǵa degen qyzyǵýshylyqtyń turaqty túrde artyp kele jatqany anyq baıqalady. Ásirese balalar ádebıetine suranys edáýir kóbeıdi. Tek sońǵy bir jyldyń ózinde balalar kitaptaryna suranys 75 paıyzǵa artsa, qazaq tiline aýdarylǵan klassıkalyq qazaq ádebıeti men álem klassıkasyna degen qyzyǵýshylyq 50 paıyzǵa ósti. Bul Qazaqstandaǵy oqyrman qaýymnyń aýqymy keńeıip, talǵamy tereńdep, sanasy sergek bola túskenin ańǵartady. Prezıdenttiń «Kitap oqıtyn ult» tujyrymdamasy aıasynda elimizde kitaphanalar salý jáne olardy jańǵyrtý baǵytynda aýqymdy jumys júrgizilip jatyr. Astana, Almaty jáne Qyzylorda qalalarynda jańa Prezıdent kitaphanalary salynatyn boldy», delingen jazbada.
Osy rette mınıstr qazirdiń ózinde 36 qalalyq jáne aýyldyq kitaphana jańǵyrtylǵanyn jazǵan. Al, 2026 jyly taǵy 30 kitaphanany jańartý josparlanyp otyr.
«Búginde Ulttyq kitap kúni jańa mazmunda, keń kólemde atalyp ótip jatqanyn da erekshe atap ótken jón. Mádenıet jáne aqparat mınıstrligi Ulttyq kitap kúnine oraı búkil el kóleminde onkúndik uıymdastyrdy. Oǵan bilim jáne mádenıet uıymdary, kitaphanalar, kolledjder, joǵary oqý oryndary men qoǵamdyq birlestikter qatysyp jatyr. Túrli aqparattyq alańdarda kitapqa, kitap oqýǵa, kitaphanalardyń róline jáne oqý mádenıetin dáripteýge arnalǵan 10 myńǵa jýyq materıal jarııalandy», dep jazdy Aıda Balaeva.
Onyń aıtýynsha, jalpy el boıynsha kitap oqý mádenıetin damytýǵa jáne qoǵamnyń zııatkerlik áleýetin nyǵaıtýǵa baǵyttalǵan 100 myńǵa jýyq is-shara ótip jatyr. Olardyń qatarynda kitap festıvalderi, jármeńkeler, avtorlarmen kezdesýler, túrli aksııalar, ádebı keshter, balalar men jastarǵa arnalǵan aǵartýshylyq is-sharalar bar.
«Qalamgerler men baspa isin memlekettik qoldaý júıesi de turaqty túrde damyp keledi. Elordada ótip jatqan IX halyqaralyq Astana Eurasian Book Fair kitap kórme-jármeńkesinde búgin «Ulttyq kitap» baıqaýy qorytyndylandy. Toǵyz atalym boıynsha jeńimpazdar anyqtalyp, «Jyl kitaby» da jarııalanady. Sonymen qatar jas jazýshylarǵa arnalǵan Prezıdenttik arnaýly ádebı syılyq, «Qazaqstannyń halyq jazýshysy» qurmetti ataǵy jáne «Aıboz» ulttyq ádebı syılyǵy taǵaıyndalǵan. Qazaqstan Jazýshylar odaǵymen strategııalyq áriptestik aıasynda da birqatar iri jobalar júzege asyrylyp keledi. Olardyń qatarynda «Jańa Qazaqstannyń ádebı-tanymdyq panoramasy» jáne «Jazýshylardyń ádebı sheberlik mektebi» jobalary bar. Bıyl Qazaqstan, Ázerbaıjan, Qyrǵyzstan jáne О́zbekstan arasyndaǵy mádenı-ádebı baılanysty nyǵaıtýǵa, shyǵarmashylyq yqpaldastyqty damytýǵa baǵyttalǵan «Túrki áleminiń ádebıeti» atty jańa jobany iske asyrý josparlanyp otyr», delingen jazbada.
Sonymen birge mınıstrlik kórkem shyǵarma arqyly qarapaıym eńbek adamdarynyń óz isine adaldyǵyn nasıhattaýdy maqsat etken «Erlik pen eńbek dastany» respýblıkalyq baıqaýyn uıymdastyrdy. Keıingi on jyl ishinde memlekettik qoldaý aıasynda 2 myńnan astam kitap jaryq kórip, olardyń jalpy taralymy 6 mıllıon danadan asty.
«Qurmetti dostar! Qazirgi qoǵamda kitapty bilim men parasattyń, mádenıet pen rýhanııattyń asyl arnasy retinde baǵalaı bilýdiń mańyzy aıryqsha. Kitap oqýdy qoldaý – bul bilimge jasalǵan ınvestısııa ǵana emes, oıly, jaýapty, zerdeli ult qalyptastyrýǵa qosylǵan úles. Barsha kitaphanashylardy, jazýshylardy, baspagerlerdi, sala mamandaryn jáne oqyrman qaýymdy Ulttyq kitap kúnimen jáne Kitaphanashylar kúnimen shyn júrekten quttyqtaımyn!», dep jazdy A.Balaeva.