Oqý jyly bastalar aldynda oblys ákimi Beıbit Atamqulov aımaqtyń jańa oqý jylyna daıyndyǵy men oqýlyqpen qamtamasyz etý máselesi boıynsha jıyn ótkizip, atqarylǵan jumystardy pysyqtady.
Aýdan, qala ákimderi qatysqan jıynda kún tártibine qoıylǵan másele boıynsha oblys ákiminiń orynbasary Erlan Aıtahanov baıandama jasady.
Balabaqsha sany oblysta 1454-ke jetip, onda 157780 bala tárbıelenýde. Basqa óńirdeı emes ońtústikte bala sany kóp bolǵandyqtan balabaqshalar jetise bermeıdi. Sondyqtan, memlekettik mekemelerden bólek jekemenshik balabaqshalarǵa qatty kóńil bólingen. Sonyń nátıjesinde memlekettik-jekemenshik áriptestikte 647 balabaqsha iske qosyldy. Osyndaı jaqsy jumystardyń nátıjesinde 3-6 jastaǵy balalardy balabaqshamen qamtý 78,3 paıyzǵa jetti.
Byltyrǵy oqý jylynda 1022 mektepte 562621 oqýshy bilim alyp, UBT-ǵa mektep bitirýshilerdiń 69,8 paıyzy qatysqan. Oblystyń orta bally ótken jyldan 4,2 ballǵa kóterilip, 78,7 balldy qurady. Al, «Altyn belgige» 608 túlek ıe bolyp, ótken jylmen salystyrǵanda 172 túlekke artqan.
– Bul respýblıkadaǵy «Altyn belgi» ıegerleriniń 30 paıyzyn quraıdy, – dedi Erlan Aıtahanov.
Budan keıin bilim berý uıymdarynyń qurylysy men jóndeý jumystary baıandaldy. Bilim mekemeleriniń qysqy jylytý maýsymyna daıyndyǵy jóninde aqpar bergen oblys ákiminiń orynbasary 1479 bilim beretin mekemelerdiń jylý júıelerine qysymdaý-syǵymdaý jumystary 94 paıyzǵa atqarylǵandyǵyn, qajetti qatty otynnyń 72 paıyzy, suıyq otynnyń 80 paıyzy tasymaldanǵandyǵyn, tabıǵı gazben jylytylatyn 355 bilim mekemeleri gaz tasymaldaýshy mekemelermen kelisimsharttar túzgendigin aıtyp ótti.
Bıyl Ońtústiktegi 1022 mektepte 562621 oqýshy bilim alady. Mektep oqýshylaryn oqýlyqpen qamtý jumystary kezeń-kezeńimen atqarylyp jatyr.Baspalarmen kelisimshart túzilgen.
Baqtııar TAIJAN,
«Egemen Qazaqstan».
Ońtústik Qazaqstan oblysy.