Oral qalasynda Keden odaǵyna múshe Qazaqstan, Reseı jáne Belarýs elderi ishki ister mınıstrleriniń, sondaı-aq keden, shekara qyzmeti, shekaralas oblystar ishki ister organdary basshylarynyń kezdesýi boldy.
Keńeske qatysýshylar Keden odaǵy jaǵdaıynda qylmyspen birlesip kúresýdiń ádis-tásilderin keńinen talqylap, alda atqarylar is-sharalardy pysyqtady.
Kezdesý orny retinde Oral qalasynyń tańdap alynýy tegin emes. О́ıtkeni Batys Qazaqstan Reseıdiń bes birdeı oblysymen shektesedi. QR Ishki ister mınıstri Serik Baımaǵanbetovtiń atap ótkenindeı, Qazaqstan men Reseıdiń shekaralas aımaqtarynda qylmysqa birlesip tosqaýyl qoıýdyń baı tájirıbesi jınaqtalǵan. Sonymen qatar mınıstr respýblıkada Elbasy bastamasymen quqyq qorǵaý júıesin reformalaý sharalary qolǵa alynǵanyn, soǵan sáıkes quqyq qorǵaý organdarynyń birqatar qyzmeti ózge organdarǵa júkteletindigin, budan bylaı ishki ister organdarynyń negizgi kúsh-qaıraty qylmyspen kúres sapasyn arttyrýǵa baǵyttalatynyn jetkizdi. Munyń Keden odaǵy jaǵdaıynda jańa sıpatqa ıe bolatyny sózsiz.
Batys Qazaqstan oblysynyń ákimi Baqtyqoja Izmuhambetov Qazaqstan, Reseı jáne Belarýs memleketteriniń Keden odaǵy birtutas ekonomıkalyq keńistik qurý jolyndaǵy asa mańyzdy qadam ekenin atap ótip, odaqtyń qazirdiń ózinde ekonomıkalyq áriptestikti nyǵaıtyp, ınvestısııalyq ahýaldy jaqsartýǵa, ishki ekonomıkalyq qyzmetti júzege asyrýda kezdesetin kedergilerdi joıýǵa, eń bastysy, halyqtyń ál-aýqatyn arttyrýǵa yqpal etip otyrǵandyǵyn basa aıtty.
Qazirgi kezde qylmystyq toptardyń transaımaqtyq baılanystar deńgeıinde jandanyp otyrǵanyn tilge tıek etken Belarýs Respýblıkasynyń Ishki ister mınıstri Anatolıı Kýleshov túrli qylmystar, zańsyz esirtki aınalymy, ekstremızm men lańkestik áreketterge tosqaýyl qoıý úshin úsh eldiń quqyq qorǵaý organdarynyń birlesken is-áreketin retteıtin memleketaralyq quqyqtyq-normatıvtik bazany jetildirýdi usyndy. Úsh eldiń quqyq qorǵaý organdary túrli is-sharalardy uıymdastyryp, aqparat, tájirıbe almasýdy budan bylaı da jalǵastyra fbolady.
Qylmyspen kúreste ortaq ustanym qajettigin qoldaǵan Reseı Federasııasynyń Ishki ister mınıstri Rashıd Nurǵalıev Keden odaǵy aıasynda jańa jumys sharttaryna birlesken tásilderdi engizýdiń mańyzdylyǵyn atap kórsetti. Bul úshin eń aldymen vedomstvoaralyq keshendi is-qımyl, birinshi kezekte shekaralyq jáne kedendik qyzmetter basty ról atqarýy tıis.
Keńeske qatysýshylar birlesken is-qımyldar barysyn sarapqa salyp, aldaǵy josparlardy belgiledi.
Temir QUSAIYN. ORAL.
* * *
Sibirlik jýrnalıster kelip ketti
Pavlodarda Reseıdiń Novosibir oblysy men bizdiń oblystyń buqaralyq aqparat quraldary ókilderiniń birlesken forýmy ótti. Sibirlik jýrnalıster qaýymyn sol jaqtaǵy odaqtyń tóraǵasy Andreı Chelnokov bastap keldi.
Basqosýda eki el arasyndaǵy ekonomıkalyq-saýda, mádenı áriptestik baılanystar, jalpy jýrnalıster arasynda aqparat almasý sııaqty máseleler qozǵaldy. Orys jýrnalısterine bizdiń elimizdiń búgingi tańdaǵy asqaraly jetistikteri ındýstrııalyq damý baǵyty, “Jol kartasy” baǵdarlamasy jaıly oblys ákiminiń orynbasary Álııa Ǵalymova baıandap berdi.
Kezdesý “Dostyq” úıinde ótti. Qazaqstandyqtardyń yntymaǵyn dáripteıtin mundaı kezdesýler árkez oblystaǵy barlyq mádenı ortalyqtardyń basyn biriktiretin osy “Dostyq” úıinde uıymdastyrylady. Budan keıin novosibirlik jýrnalıster bolashaq jazbalaryna arqaý bolatyndaı málimetter jınap, oblys ortalyǵyndaǵy Pavel Vasılev mýzeıinde, zaýyttarda, ásem Baıanaýylda, kómirli Ekibastuzda boldy.
Farıda BYQAI. PAVLODAR.