Keshe elimizdiń Memlekettik hatshysy – Syrtqy ister mınıstri Qanat Saýdabaev Qazaqstanǵa resmı saparmen kelgen Tájikstan Respýblıkasynyń Syrtqy ister mınıstri Hamrohon Zarıfımen kezdesti.
Kezdesý barysynda taraptar ekijaqty qarym-qatynastardyń kóptegen máselelerin talqylady. Sonyń ishinde halyqaralyq birlestikter sheńberindegi ekijaqty yntymaqtastyq pen ózara yqpaldastyqtyń perspektıvalary, Ortalyq Azııa aımaǵyndaǵy qaýipsizdikti qamtamasyz etý máseleleri qarastyryldy. Sońǵy másele boıynsha Aýǵanstan problematıkasy týraly da pikir almasyldy. Halyqaralyq uıym sheńberindegi yntymaqtastyq máselesin talqylaǵanda taraptar ústimizdegi jyldyń 1-2 jeltoqsanynda Astanada bolatyn EQYU Sammıti kún tártibiniń jobasy týraly da sóz qozǵady. Kezdesýden keıin jýrnalısterge bergen suhbatynda Qanat Saýdabaev ekijaqty qarym-qatynasta sheshilmegen túıinder joq ekenin atap ótti. Biz barlyq máselede de ortaq kelisimge kelip, bir-birimizge qoldaý bildirip kelemiz, dedi ol.
Shaǵyn quramdaǵy kezdesýden keıin kelissóz Qazaqstan men Tájikstan Syrtqy ister mınıstrleri keńesiniń (SIMK) 1-shi otyrysynda jalǵasty. Onda ekijaqty saýda-ekonomıkalyq jáne mádenı-gýmanıtarlyq yntymaqtastyqtyń perspektıvalary qarastyryldy. Sondaı-aq Qazaqstan men Tájikstan arasyndaǵy Memleketaralyq úılestirý keńesiniń birinshi otyrysyn qaıda jáne qashan ótkizý, kún tártibine qandaı máseleler engizý týraly pikir almasyldy.
Kelissózderden keıin ekijaqty yntymaqtastyqty damytý joldaryn naqtylaǵan SIMK hattamasyna jáne Qazaqstan Respýblıkasy Úkimeti men Tájikstan Respýblıkasy Úkimeti arasynda dıplomatııalyq ókildikter ǵımaraty qurylysyn salýǵa jer telimderin bólý jónindegi kelisimge qol qoıyldy. Al SIMK-niń kelesi otyrysy Dýshanbede ótetin bolyp belgilendi.
Jaqsybaı SAMRAT.