Isataı aýdanyndaǵy eki ken orny aralyǵynda gaz qubyry úshin qazylǵan jyraǵa jeke ıeliktegi maldardyń qulap, qyrylǵanyna oraı aýdandyq ákimdik resmı málimdeme taratty. Onda tómende anyqtalǵan derekter jarııa etildi.
«Munaı kompanııasynyń tapsyrysy boıynsha ilespe gaz qubyryn salý jumystary júrgizilgen. Osy jumystar úshin uzyndyǵy 13 shaqyrym shuńqyr qazylǵan. Bul jumysty «Monolıt Invest Kompanı» JShS oryndaǵan. Jeltoqsan aıynyń sońy men qańtar aıynyń bastapqy kúnderindegi jaýǵan qalyń qar men borasyn shuqyrlardy toltyryp bitep tastaǵan. Osy sebepti dalada júrgen maldar qardan baıqalmaıtyn shuqyrlarǵa túsip ólgen. Aýdan ákimdigi bul oqıǵaǵa baılanysty shuǵyl mamandardan, quqyq qorǵaý organdary ókilderinen arnaıy top quryp, máseleni jan-jaqty qaraý jáne ólgen maldardyń ıelerin anyqtaý jumystaryn júrgizdi. Akt jasaldy. Nátıjesinde 39 jylqy, 1 túıe malynyń ólekseleri tabyldy. Maldyń túri, túsi, tańbasyna qaraı ıeleri anyqtaldy. 13 qańtarda merdiger mekeme – «Monolıt Invest Kompanı» JShS-niń bas dırektory Bıbinur Iýsýpovamen aýdan ákimdiginde kezdesý ótkizilip, qalyptasqan jaǵdaıǵa baılanysty alynatyn sharalar kelisildi. Kompanııa mal ıelerine (17 adam) 5,8 mıllıon teńge ótemaqy tóleýdi moınyna aldy», delingen Isataı aýdandyq ákimdiginiń resmı málimdemesinde.
Osyǵan baılanysty Isataı aýdanynyń ákimi Turarbek Sultanbekovpen birge tapsyrys berýshi jaq pen merdiger mekeme, quqyq qorǵaý organdary basshylary oqıǵa ornyna baryp, turǵyndarǵa máseleni túsindirdi. Mańdaı terimen tapqan malynan aıyrylǵan turǵyndarǵa ótemaqynyń tólenýi aýdan ákimdiginiń baqylaýyna alynyp otyr.
Joldasbek ShО́PEǴUL,
«Egemen Qazaqstan».
Atyraý oblysy.