ASTANA. 20 aqpan. Faız Sýbrı esimdi malaızııalyq fýtbolshy aty ańyzǵa aınalǵan Roberto Karlostyń ataqty aıyp soqqysyn qaıtalap, ǵajaıyp goldyń avtory atandy. Bul týraly ua-football.com portalyna silteme jasaǵan egemen.kz tilshisi habarlady.
Mundaı gol Malaızııa premer-lıgasy sheńberindegi «Pýlaý Penang» pen «Pahang» komandalarynyń kezdesýinde soǵyldy. Atap aıtqanda, «Pýlaý Penang» klýbynyń jartylaı qorǵaýshysy Faız Sýbrı qaqpaǵa 30 metr jerden aıyp soqqysyn oryndaıdy. Ushqan dop áýede baǵytyn ózgertip, qaqpanyń toǵyzdyǵyna baryp top ete túsken. Qazirdiń ózinde malaı jankúıerleri bul goldy Malaızııa fýtbolynyń tarıhyndaǵy eń úzdigi dep baǵalaýda. Sondaı-aq, mamandar atalǵan goldyń jyl sońynda Pýshkash syılyǵynan úmitker bolý múmkindigin de joqqa shyǵarmaıdy.
Al álemdik aqparat quraldary bul goldy birden 1997 jyly Brazılııanyń ataqty oıynshysy Roberto Karlostyń Fransııa qaqpasyna soqqan golymen salystyryp úlgerdi. Tipti, keıbir basylymdar Faız Sýbrıdi Karlostyń izbasary dep atady.
Taǵy bir nazar aýdaratyn jaıt, osy ǵajaıyp goldyń Youtube-tegi qaralymy 4 kúnniń ishinde 2 mıllıonnan asqan.
Aıta keteıik, atalǵan oıynda «Pýlaý Penang» komandasy 4:1 esebimen jeńiske jetti.
Elaman Qońyr.
Derek: ua-football.com.
Sýret: hype.my.
1997 jyly Roberto Karlostyń Fransııa qaqpasyna soqqan goly