ASTANA. 21 aqpan. AQSh-tyń Lýızıana shtatyndaǵy túrmede jazasyn ótep, 43 jyl boıy bir kisilik kamerada qamaýda otyrǵan adam bostandyqqa shyqty. Bul týraly BBC-ge silteme jasaǵan egemen.kz tilshisi habarlady.
Albert Výdfoks esimdi afroamerıkalyqty 1972 jyldyń sáýirinde túrmede bolǵan búlikten keıin jalǵyz adamdyq kameraǵa qamaý týraly úkim shyǵarylǵan. Atalǵan búlik saldarynan túrme kúzetshileriniń biri qaza tapqan bolatyn.
Výdfoksty birese kúzetshiniń ólimine kináli dep tanysa, endi birde onyń jazyǵy joq ekeni anyqtalyp, bul iske qatysty sońǵy sheshim shyǵarý uzaqqa sozylǵan. Alaıda, ony 2h3 metrlik kameradan shyǵarý týraly sóz qozǵalmaǵan. Sonyń saldarynan 43 jyl boıy táýliktiń 23 saǵatyn atalǵan orynda ótkizgen Albert Výdfoks kúnine bir saǵat qana taza aýa jutý úshin jan-jaǵy bıik beton dýalmen qorshalǵan aýlaǵa shyǵarylǵan.
Alǵashynda Albert Výdfoks qarý qoldanyp, tonaǵany úshin túrmege otyrǵyzylǵan eken. Sondaı-aq, ol afroamerıkalyqtardyń quqyn qorǵaǵan «Qara qabylan» («Chernaıa pantera») radıkaldy uıymynyń negizin qalaýshylardyń biri sanaldy.
The Guardian basylymynyń habarlaýynsha, Výdfoks AQSh túrmelerindegi bir kisilik kamerada otyrý merzimi boıynsha rekord janartqan.
Elaman Qońyr.
Derek: BBC.
Sýret: ntv.ru.