Taıaýda Gollıvýd juldyzy Leonardo Dı Kaprıo aldaǵy 10 kúndik demalysyn Mońǵolııada ótkizetinin málimdedi. Ol jaqta ataqty akterdi eshqandaı bes juldyzdy qonaq úı kútip turmaǵanyn atap ótken jón. Sondaı-aq, jeke júrgizýshisi bar kólik te «juldyzǵa» qyzmet kórsetpeıdi.
Esesine, akter sol 10 kúnde kıiz úıde turatyn bolady. Ol az deseńiz, barar jerine jylqymen jetip, kúndelikti as mázirindegi negizgi sýsyndardyń qataryna qymyz qosylady. Bir sózben aıtqanda, Dı Kaprıo kóshpendilerdiń ómir-saltyn kózben kórip qana qoımaı, ózin solardyń biri retinde sezinýge múmkindik alyp otyr.
The Telegraph basylymynyń habarlaýynsha, akter bul saıahaty úshin 95 myń AQSh dollaryn tóleıdi. BAQ ókilderine bergen suhbatynda Dı Kaprıo ózi basty rólin somdaǵan The Revenant («Tiri qalǵan) fılmindegi keıipker sııaqty tabıǵatpen betpe-bet kelip, jalǵyzdyqta ómir súrýdiń áserin sezingisi keletinin aıtqan.
Mońǵolııa sapary barysynda akterdiń qasyna jol bastaýshy retinde shved zertteýshisi Iohan Ernst Nılson men jeke aspazy eredi. Osyndaı erekshe saıahattardy uıymdastyrýshy maman I.Nılson bul sapar jóninde: «Men barlyq tutynýshylaryma qıyndyqtar men kedergilerden turatyn jolmen júrip ótýdi usynamyn. Keıde janǵa jaıly, rahat ómirden qol úzip, sol ortaǵa ózge bir qyrynan qaraýdyń artyqtyǵy joq. Onyń áseri de erekshe bolady», – deıdi.
Ernar MUHAMBET.