ASTANA. 18 naýryz. Búgin Astana fýtbol federasııasynyń www.sportsffa.kz atty jańa aqparattyq-saraptamalyq portalynyń tusaýkeser rásimi ótti. Bul týraly egemen.kz tilshisi habarlady.
Oǵan Astana men Almatydaǵy sport jýrnalısteri qatysty. Tusaýkeserde jańa portal týraly jan-jaqty málimet berildi. Qalalyq fýtbol federasııasynyń prezıdenti Lashyn Aımaǵambetov qoǵamdyq uıymnyń qyzmeti, osy kezge deıin atqarǵan jumystary týraly baıandap berdi.
«Bizdiń federasııa Qazaqstan Respýblıkasynyń Zańyna sáıkes 2014 jyldyń 3 shildesinde resmı túrde memlekettik tirkelimnen ótti. Federasııa ár jas ókilderi úshin turaqty túrde fýtbol, fýtzal, shaǵyn fýtboldan týrnırler men jarystar ótkizip turady. Bul týraly www.sportsffa.kz portalynyń AFF bóliminen aqparat alýǵa bolady. AFF basqa da jumystar atqarady. Mysaly, balalardy jattyqtyrý, jattyqtyrýshylar, tóreshiler, ınspektorlar men menedjerlerdi daıyndaý sııaqty jumystar bar. Osynyń barlyǵy fýtboldy damytýǵa septigin tızigip jatyr», dedi ol.
Sonymen birge ol federasııanyń «S» sanatyndaǵy jattyqtyrýshylardy daıyndaýdy qolǵa alǵanyn, olar úsh kún oqyp, tıisti sertıfıkat alǵan soń áýesqoı komandalar men balalardy jattyqtyra alatynyn aıtty. «Osy maqsatta byltyr mamyr aıynda federasııa «Balalar fýtbol ortalyǵyn» ashty. Bul jerde balalar jasqa bólinip, kókmaısa alańda teńbil doptyń qyr-syryn úırenip, jarystarǵa qatysady. AFF balalar fýtbolyn damytý maqsatynda Astana qalasy dene shynyqtyrý jáne sport basqarmasymen jáne qalalyq bilim basqarmasymen yntymaqtastyq týraly memorandým jasap, alǵash ret fýtzaldan Oqýshylar lıgasyn ótkizdi. Oǵan qalamyzdyń 52 mektebinen 85 komanda qatysty», dedi federasııa prezıdenti. Onyń aıtýynsha, Oqýshylar lıgasy eki jas toby boıynsha ótti. 2001/02 jylǵy jetkinshekter arasyndaǵy jarystar «Alaý» muz aıdynynyń alańynda ótip, №56 mektep lıseıi jeńiske jetse, 2003/04 jylǵy balalar arasyndaǵy týrnırde №37 mekteptiń oqýshylary jeńimpaz atandy.
Rásimde federasııanyń qyzmeti jaıynda basqa da qyzyqty málimetter berildi. Federasııanyń vıse-prezıdenti Álııa Dúısekeeva jańa portal týraly aıtyp berdi. «Buryn federasııanyń elektrondy basylymy bolatyn. Qazir ózderińiz kórip otyrǵandaı, álemde kún saıyn jańalyqtar bolyp jatyr. Sonyń biri – portaldar men saıttar, áleýmettik jeliler. Osyǵan baılanysty ýaqyt kóshinen qalmaı, basqa uıym, mekemelerdiń aldy bolýy úshin qyzmetimizdi jan-jaqty taratyp, nasıhattaý maqsatynda jańa portal ashyp otyrmyz. Ol Sportsffa.kz portaly dep atalady. Munda onlaın júıede federasııa aıasyndaǵy dodalardyń barlyǵy jarııalanyp otyrady. Týrnır hattamalary, týrnır kesteleri, surmergender, oıyndarǵa sholý, foto-beınereportajdar – bári-bári bizdiń portalymyzda kórinis tabatyn bolady», dedi ol.
Álııa Dúısekeevanyń sózinen belgili bolǵandaı, 2016 jyldyń 1 qańtarynda ashylǵan jańa portaldyń basty maqsaty – áýesqoı fýtboldan bastap kásipqoı deńgeıdegi barlyq dodalardyń barlyǵyn qamtý. «Portalda basymdylyq saraptamalyq maqalalarǵa beriledi. Iаǵnı, Qazaqstan fýtbolyndaǵy ózekti máselelerdi jan-jaqty saraptap, talqylap, pisken kúıde oqyrmanǵa jetkizý. Sondaı-aq, fýtbolshy, jattyqtyrýshy, sarapshy, fýnksıoner mamandarmen suhbattasý arqyly aqparatty birinshi bolyp jetkizip, belgili bir másele jaıly kózqarasyn bilý», dedi ol.
Osydan keıin ortaǵa federasııanyń qyzmetkerleri shyǵyp, jumystary týraly aıtyp, óz oılarymen bólisti. Portaldyń qazaq bóliminiń redaktory belgili sport jýrnalısi Nurǵazy Sasaev, saıtta eki tilde jazatyn jas áriptesimiz Ázız Orazbaev, orys bóliminiń redaktory Vladımır Malsev, materıaldardy aǵylshyn tilinde daıyndaıtyn Tilek Adryshev, jattyqtyrshylar men tóreshiler, basqa da qyzmetkerler qyzyqty málimetterden habardar etti. Mysaly, Nurǵazy Sasaev federasııa men jańa portaldyń jumysyna bir kisideı qyzmet etip jatqan áriptesteriniń eńbegin aıtty. «Qazir federasııa buqaralyq sportty, balalar fýtbolyn damytýda kóp jumystar atqaryp jatyr. Kóptegen týrnırler ótkizile bastady. Bul úshin federasııa basshylyǵy qolda bar múmkindiktiń bárin jasap keledi. Sonymen birge tóreshiler alqasynyń tóraǵasy Ǵalymjan Kenjalınovtiń, menedjerler Danat Muhametǵalıev, Erik Shynshalınov, Ernar Qusaıynov, Balalar fýtbol ortalyǵynyń jattyqtyrýshysy Aleksandr Chernıkovtiń da eńbegin atap ótýge bolady. Osy bes adam 50 adamnyń jumysyn jasap, júgin kóterip kele jatyr. Eger basqa federasııalarda 50-100 adam jumys istep, onyń ózin durys ákete almaı jatsa, bizdiń bes jigitimiz 100 adamnyń jumysyn atqaryp otyr», dedi ol. Al portaldyń jumysy týraly Nurǵazy Sasaev aǵylshyn tilindegi maqalalardyń blog ispettes júrgiziletinin, qazaq tilindegi maqalalar men orys tilindegi materıaldar bir-birinen aýdarylmaıtynyn eskertti.
«Portal redaksııasynyń komandasy – elimizge belgili, sporttyq, onyń ishinde fýtbol jýrnalıstıkasynda tájirıbeleri mol, Eýropa jáne álem chempıonattary men Olımpııa oıyndarynda qyzmet atqarǵan kásipqoı mamandar», dedi áriptesimiz.
Kezdesýde Ázız Orazbaev osy jazda Jýrnalıster lıgasynyń ashylatynyn, ol úsh aı boıy, ıaǵnı maýsym, tamyz, qyrkúıek aılarynda ótetinin aıtty. Orys bóliminiń redaktory Vladımır Malsev «Tarıh» bóliminiń jumysyna toqtalyp, portalda jarııalanatyn tarıhı materıaldar oqyrmandar tarapynan tıisti baǵasyn alatynyna senim bildirdi. «Bul bólimdegi materıaldardy oqyrmandar qyzyǵa da qunyǵa da oqıtyny sózsiz. Munda sizder el fýtboly men elorda fýtbolynyń tarıhynan qyzyqty málimetter taba alasyz», dedi ol..
Tusaýkeser sońynda federasııanyń prezıdenti, qyzmetkerleri jýrnalısterdiń suraqtaryna jaýap berdi. Suraq-jaýap pishininde ótken kezdesýde oqyrmandar tarapynan Shtattaǵy ulttyq komandalar jáne sport rezervi dıreksııasynyń baspasóz hatshysy Ardaq Toǵymov, Qazaqstan sport baspasózi qaýymdastyǵynyń prezıdenti Ilııas Omarov pen osy joldardyń avtory Astana fýtboly týraly óz oılaryn aıtyp, jańa portaldyń jumysyna sáttilik tiledi. Osydan keıin federasııanyń prezıdenti Lashyn Aımaǵambetov portal redaksııasynyń materıaldardy kásipqoı, saýatty túrde, ábden pisirip baryp oqyrmanǵa jetkizýdi maqsat etip otyrǵanyn, Astana fýtbol federasııasynyń AFF abbrevıatýrasy da portalymyzdyń «Fýtbol. Faktiler. Aqparat» uranymen úndes ekenin aıtty.
«Osy múmkindikti paıdalana otyryp, el fýtbolyna beı-jaı qaraı almaıtyn barsha azamattarymyzdy seriktestikke shaqyramyz. «Fýtbol. Faktiler. Aqparat» portaly sizderdi áriptestermen pikir almasýǵa, oı bólisýge jáne kásipqoı baıqaýlarǵa qatysýǵa shaqyrady», dedi ol sóziniń sońynda.
Dastan Kenjalın.
Derek: egemen.kz
Sýret: Astana qalasy fýtbol federasııasy.