ATYRAÝ. 26 sáýir. Atyraý qalalyq №2 soty oblystyq memlekettik eńbek ınspeksııasynyń burynǵy basshysy Salavat Ishaıdy qylmystyq kodekstiń 366-babynyń 2-bólimi boıynsha qylmys jasady dep tanydy. Oǵan atalǵan kodekstegi 55-bapty qoldaný arqyly 8 mln. 820 myń teńge aıyppul salyndy, sonymen birge, múlki tárkilenip, ómir boıyna memlekettik qyzmettegi laýazymdy ıelený quqyǵynan aıryldy. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady.
«Qylmystyq is materıaldarynan belgili bolǵandaı, Salavat Ishaı Unicorn CCC jáne «Mıster Doors-Atyraý» jaýapkershiligi shektelgen seriktestikteriniń jaýapty tulǵalarynyń tehnıka qaýipsizdigi jónindegi bilimin tekserý jónindegi komıssııasynyń jetekshisi bolyp taǵaıyndalǵan. Kompanııa quryltaıshysy A.Kımnen kompanııanyń tehnıka qaýipsizdigi boıynsha oqytýdan ótken ár tulǵasy úshin sertıfıkattar men kýálikterge qolǵa qoıýǵa 3000 teńgeden syıaqy talap etken. Keıin A.Kım bul talappen kelisip, aradaǵy deldal, ıaǵnı, kompanııa qyzmetkeri arqyly 294 000 teńge berip jibergen. Sol kúni Salavat Ishaı óziniń qyzmettik kabınetinde jemqorlyqqa qarsy kúres qyzmetiniń qyzmetkerlerimen parany alǵannan keıin ustalǵan» – dedi oblystyq sottyń baspasóz qyzmeti.
Aıta keteıik, sotqa deıingi tergeý barysynda prosessýaldyq kelisim talaptaryn saqtaldy.
Joldasbek Shópeǵul.
Derek: Atyraý oblystyq sotynyń baspasóz qyzmeti.
Foto: Rahym Qoılybaev.