Kelisim bar jerde eńbekke de,

baılyqqa da, baqytqa da oryn tabylady О́ńirge jumys saparymen kelgen Memlekettik hatshy Gúlshara Ábdiqalyqova men oblys ákimi Bolat Baqaýov oblys ortalyǵyndaǵy «Qazaqstan Alıýmınııi» AQ-ta boldy. Kásiporynnyń májilis zalynda ótken «Jumysshy jastar keńesiniń» jıynyna óńirdegi óndiris oryndarynda eńbek etip júrgen 200-den astam jas qatysty. Kezdesý barysynda G.Ábdi­qalyqova men B.Baqaýovqa «Qazaq­stan elektrolız zaýytynda» shyǵarylǵan pavlodarlyq alıýmınıı quımasy syıǵa tartyldy. Bul kúnderi óńirdegi óndiris oryndarynda 35 jasqa deıingi 56 myń jas jumysshy mamandyǵy boıynsha eńbek etýde. Mysaly, «Pavlodar munaı-hımııa zaýyty» JShS ınjeneri Danııar Kúshenovtiń aıtýynsha, óndiris oryndaryna kelgen jastar bilimderi men biliktilikterin de shyńdaýda. Jáne de qazirgi talapqa saı jastar óndiriste jańa tehnologııalyq qurylǵy, qondyrǵylarmen jumys jasap, aldaǵy ýaqytta kásiporyndy jańǵyrtýǵa úles qosady. G.Ábdiqalyqova elimizde júzege asyrylyp jatqan jastar saıasaty máselesine toqtaldy. Elimizdiń barlyq oblystarynda 17 jumysshy jastar keńesi bar. Barlyq kásiporynda jastardyń bilim alyp, biliktiligin arttyrýy úshin sharalar qabyldanady. Pavlodar oblysynyń 45-ke jýyq joǵary jáne orta kásiptik, kollejderinde dýaldy oqytý júıesi engizilgen. Endi aldaǵy jyldardan bastap barlyq jastar úshin kásiptik-tehnıkalyq bilim alý tegin bolady. Sońǵy kezderi elimizde 2,4 mlrd. dollar kolledj stýdentterin oqytýǵa jumsalǵan. Adam kapıtalyn damytý mindeti qoıylyp, bilim berý, densaýlyq saqtaý jáne jastardyń áleýmettik qorǵalýyna basa nazar aýdarylyp otyr, dedi Memlekettik hatshy. Sonymen qatar, kezdesýde G.Ábdiqalyqova jastarǵa eldegi jastar saıasaty týraly zań men qazaqstandyq jastarǵa bilim alýǵa, jumys isteýge, biliktilikterin arttyrýǵa, bilim alýdaǵy áleýmettik paketter men jeńildikterdi paıdalanýǵa jol ashatyn ózge qujattar jaıly baıandady. Al zaýyt jas­tar keńesiniń basshysy Oksana Parshýkovanyń aıtýynsha, kásip­orynda quramynda 23 jas bar keńes jumys jasaıdy. Bizdiń kásiporyn oblys ortalyǵyndaǵy Vorýshın atyndaǵy saıabaqty qamqorlyqqa alǵan. Bıyl 300-deı kásiporynnyń jas jumysshylary saıabaqty qalpyna keltirý, tazalaý jumystaryna qatysty. Zaýytta 2500-deı jas maman eńbek etedi. Olarǵa jas­tar qoǵamdyq keńesi tarapynan qoldaý kórsetilip, qajetti áleýmettik jaǵdaılaryna nazar aýdarylady, dedi O.Parshýkova. Budan keıin G.Ábdiqalyqova oblystaǵy «Isker áıelder qaýym­dastyǵymen» de kezdesti. Jalpy, oblysta 148 aýyldyń 25-in áıel basqarady. Sońǵy jyldarda oblysymyzda túrli salany basqa­ryp otyrǵan áıelder qaýymynyń sany artqan. Mysaly, 22 oblys­tyq basqarmanyń beseýin áıel­der basqarady. Al bas­qarmalar basshylarynyń orynbasarlary arasynda olardyń sany – 9. Sonymen qatar, jergilikti at­qarý­shy bıliktiń barlyq mem­lekettik qyzmetkerleriniń 73,3 paıyzy áıelder, dedi kezdesýde oblys ákiminiń orynbasary Meıram Begentaev. Al, eń bastysy, áıel-analar­dyń densaýlyǵyn saqtaý úshin olardyń skrınıngten ótýine 84 mıllıon tenge bólingen. Bul týraly G.Ábdiqalyqovanyń óńirdegi áıelder qaýymynyń ókilderimen kezdesýi barysynda №2 perzenthananyń bas dárigeri Aıman Ospanova málim etti. Iаǵnı, skrınıngtik tekserýdiń nátıjesinde áıelder arasynda jańadan paıda bolǵan qaterli isiktiń tómendeýi baıqalady. Sút beziniń qaterli isigi 2,1 paıyzǵa jáne jatyr moıny qaterli isigi 0,5 paıyzǵa azaıǵan. Oblys emdeý oryndarynda 10 mammo­grafııa­lyq kabınet jumys jasaıdy. Tústen keıin Memlekettik hatshy Gúlshara Ábdiqalyqovanyń qatysýymen «Qoǵamdyq kelisim» saraıynda oblystyq Qazaqstan halqy Assambleıasynyń «Táýel­sizdik. Kelisim. Bolashaǵy Birtutas Ult» kún tártibimen HHII sessııa­sy ótti. Sessııany kirispe sóz sóılep ashqan oblys ákimi Bolat Baqaýov: – Búgin biz Memlekettik hatshy Gúlshara Naýshaqyzynyń qatysýymen oblystyq Qazaqstan halqy Assambleıasynyń HHII sessııasyna jınalyp otyrmyz. Sessııa jumysyna oblystyq Assambleıa músheleri, qalalar men aýdandardyń etnomádenı bir­les­tikter ókilderi, úkimettik emes uıymdardan ókilder qaty­syp otyr. Elbasy Nursultan Nazarbaev aıqyndap bergen basym baǵyttardy oryndaý, elimiz­diń ekonomıkasyn damytý, Elba­sy­nyń bastamasymen qolǵa alynǵan «100 naqty qadam» Ult Josparyn júzege asyrý úshin birlik, tatýlyq aýadaı qajet, – dedi. Elbasynyń ortaq múddege jumyldyrǵan tatýlyq, yntymaq­tastyq, berik dostyqty saqtaý saıasaty el ishinde qoldaý tapty. Bul kúnderi Otan, táýelsizdik, turaqtylyq, turaqty damý degen uǵymdar árbir qazaqstandyqtyń júrek-jadynan berik oryn alǵan. Bul kúnderi «Dostyq úıinde» oblystyq Qazaqstan hal­qy Assambleıasynyń hat­shy­lyǵy, 18 etnomádenı birles­tik, Assambleıanyń jastar bir­lestigi, ulttyq órkendeý mek­tebi, 9 qalalyq ulttyq mádenı bir­lestik, 30-ǵa jýyq aýdan, aýyldarda fılıaldary, jastardyń 14 ulttyq birlestigi jumys isteı­di. 1996 jyly ashylǵan ulttyq «Jańǵyrý» mektebinde qazir 17 ult­tyń ul-qyzdary, atap aıt­qanda, 600-ge jýyq oqýshy ózderi­niń ana tilderin, salt-dástúrlerin, tarıhyn oqyp-úırenýde. G.Ábdiqalyqova oblysta jasalyp jatqan ıgi sharalarǵa oń baǵasyn berdi. Qurmetti jı­nal­ǵan qaýym! Aldymen pav­lo­dar­lyqtardyń ótken jyly atqarǵan jumystary úshin alǵy­symdy bildirgim kelip otyr. Osy atqarylǵan isterdiń barlyǵy da el birliginiń ozyq úlgisi bolyp tabylady, dedi ol. Sessııa barysynda oblystyq Qazaqstan halqy Assambleıasy tóraǵasynyń orynbasary bolyp T.Shevchenko atyndaǵy ýkraın etnomádenı birlestiginiń basshysy Mıhaıl Parıps saılandy. Shara sońynda «Daryndy balalarǵa arnalǵan mýzykalyq mektep-ınternaty» dırektory Vıktor Denısenko men «Qazaqstan koreıleri qaýymdastyǵy» oblys­tyq fılıalynyń basshysy Rýslan Tıan Qazaqstan halqy Assam­b­leıasynyń qoǵamdyq «Birlik» altyn medalimen marapattaldy. Budan keıin Memlekettik hatshy Gúlshara Ábdiqalyqova Júsip­bek Aımaýytov atyndaǵy qazaq tea­trynda ótken mádenıet jáne óner qyzmetkerleriniń kúnine arnalǵan merekelik sharalarǵa qatysty. Farıda BYQAI, «Egemen Qazaqstan» Pavlodar oblysy Sýretti túsirgen Valerıı BÝGAEV