Irakta TGIL sodyrlarynyń qupııa jerasty joly tabyldy

ASTANA. 30 mamyr. Iraktyń Al-Fallýdja qalasyna taıaý jerden úkimet áskeri lańkesterdiń birneshe qupııa jerasty jolyn tapty. Bul týraly 24.kz-ke silteme jasaǵan egemen.kz tilshisi habarlady. Málimetter boıynsha, qaqtyǵys kezinde jeńile bastaǵan sodyrlar dál osy jerlerge jasyrynǵan. Al eń uzyn jerasty jol kirpish zaýytynyń mańaıynan qazylǵan. Sonymen qatar, osydan birneshe kún buryn úkimet áskeri TGIL lańkestik uıymynyń 80 múshesiniń kózin joıǵan. Atalǵan terrorlyq top Al-Fallýdja qalasyn 2014 jyly basyp alǵan. Osyǵan baılanysty qazirgi tańda qalany azat etý úshin arnaıy operasııa jumystary júrip jatyr. Áskerılerdiń birneshe shabýylynan keıin biraz adam qaladan shyǵyp úlgergen. Alaıda, málimetter boıynsha, áli 50 myńǵa jýyq adam Al-Fallýdjadan kete almaı otyr. Aıta keteıik, ótken jyly Birikken Ulttar Uıymy Irakta bir jyldyń ishinde 15 myńǵa jýyq beıbit turǵyn sodyrlardyń qolynan qaza tapqanyn málimdedi. Aıan Ábdýálı. Derek, foto: 24.kz