Júırikter marapattaldy

О́.Joldasbekov atyndaǵy Stýdentter saraıynda matematıka, fızıka jáne ınformatıka pánderinen HIII Halyqaralyq Jáýtikov olımpıadasynyń jabylý saltanaty ótti. 12-18 qańtar aralyǵynda Bilim jáne ǵylym mınıstrliginiń jáne Almaty qalasy ákimdiginiń qoldaýymen ótken dástúrli bilim dodasyna bıyl Reseı, Grýzııa, Belorýssııa, Bolgarııa, Rýmynııa, Mońǵolııa, О́zbekstan, Túrikmenstan, Ázer­baıjan sııaqty álemniń 15 elinen 401 oqýshydan turatyn 62 komanda qatysqan bolatyn. Bul áıgili bilim dodasynda Qazaqstan atynan 144 oqýshy baǵyn synap kórdi. Bıylǵy olımpıadanyń erek­sheligi – elimizdiń ár oblysynan qurama komandalar qatysty. «Halyqaralyq dárejedegi mun­daı olımpıadalarǵa alǵash qaty­syp otyrǵan balalalar úshin bul saıys úlken tájirıbe boldy. Jalpy, qazaq balalary eki nárseden myqty túsip jatady: bireýi bokstan, ekinshisi matematıkadan», – dep professor Asqar Jumadildaev aıtqandaı, Jáýti­kov olımpıadasynda elimiz talaı halyqaralyq olımpıadalarda ózgelerden oza shaýyp, álemdik deńgeıdegi myqty mekteptermen básekege túsip júrgen respýblıkalyq fızıka-mate­matıka mektebine aıryqsha úmit artqan edi. Úmit údeden shyqqandaı. Sarapshy mamandardyń aıtýyn­sha, olımpıada suraq­tary byltyrǵy jylmen salys­tyrǵanda, áldeqaıda kúrdeli boldy. Sondyqtan zııatkerlik saıy­synda baby men baǵy qatar janǵan daryndy balalar ǵana jeńiske jete aldy. Olımpıada qorytyndysy boıynsha, Qazaq­standaǵy, alys-jaqyn sheteldegi 7 mamandandyrylǵan mekteptiń quramasy úzdik komandalar atandy. Onyń ishinde Máskeýden kel­gen №1329 mektep eń úzdik ko­manda retinde Gran-prıge ıe boldy. Komandalyq 1-oryndy Ser­bııa astanasy Belgradtan kelgen mektep oqýshylary jeńip alsa,  2-oryndy Reseıdiń Sankt-Peterbýrg qalasynyń №239 fızıka-matematıka lıseıi men Chelıabi qalasynyń №31 lıseıi bólisti. 3-orynǵa Jáýtikov atyn­daǵy respýblıkalyq mektep (Qazaqstan), Tbılısıden kelgen V.Komarov atyndaǵy №199 fızıka-matematıka mektebi (Grýzııa) jáne Máskeý mem­lekettik ýnıversıtetiniń (Re­seı) mamandandyrylǵan oqý-ǵylymı ortalyǵynyń komandasy laıyq dep tanyldy. Úzdik komandalardyń ár múshesine baǵaly syılyqtar men arnaıy marapat qaǵazdary tabys etildi. Olımpıadada sarapqa salyn­­ǵan 198 medaldan jekeleı birinshilik boıynsha 40 altyn, 61 kúmis jáne 97 qola medal úlestirildi. Qazaqstan komanda­la­ry 7 altyn, 18 kúmis, 31 qola, jal­­py sany 56 medal jeńip aldy. Joǵary deńgeıde ótken olım­pıadanyń júldegerleri men jeńimpazdaryna ál-Fara­bı atyndaǵy Qazaq ulttyq ýnı­versıteti, Qazaq-Brıtan teh­nıkalyq ýnıversıteti jáne Aqparattyq tehnologııalardyń halyqaralyq ýnıversıteti arnaıy oqý granttaryn tabys etti. Sonymen qatar, olımpıadada qabilet-qarymymen kózge túse bilgen oqýshylarǵa N.Qap­parov atyndaǵy arnaıy syılyq taǵaıyndaldy. Al Bostandyq aýdanynyń ákimdigi «Matematıka esepterin erekshe jolmen shesh­keni úshin» atalymymen jeke marapatyn tabys etti. Alǵashqy «múshel jasyna» aıaq basqan halyqaralyq Jáýtikov olımpıadasyn ótkizýde Bilim jáne ǵylym mınıstrligi, ál-Farabı atyndaǵy QazUÝ jáne Almaty qalasynyń ákimdigi úlken qoldaý kórsetkenin aıta ketý kerek. Búkil álem moıyndaǵan bul mekteparalyq olımpıadanyń maqsaty oqýshylar arasynda fızıka-matematıka ǵylymdaryn nasıhattaý, halyqaralyq árip­testikti nyǵaıtý, álemdegi úzdik mamandandyrylǵan mektepter arasynda dostyq qarym-qaty­nas ornatý, olımpıadalar uıymdastyrý, tájirıbe al­masý jáne Qazaqstannyń bi­lim áleýetin pash etý bolyp tabylady. Mıra BAIBEK, «Egemen Qazaqstan» ALMATY