Sharany oblys ákimdiginiń jastar saıasaty máseleleri basqarmasy uıymdastyryp, jastardy Joldaýda kórsetilgen negizgi maqsattar men mindetterdi júzege asyrýǵa atsalysýǵa shaqyrdy.
Sonymen qatar, atalǵan jıynda Taraz qalasyndaǵy jastardyń túrli sanattaryna arnalǵan «Keńes berý alańy» da quryldy. Búginde jumyssyz, múmkindigi shekteýli, sondaı-aq jeke kásibin ashýǵa nemese kásibin damytýǵa nıetti jastardyń da túrli baǵyttaǵy memlekettik qoldaý tetikterin paıdalanýǵa múmkindigi bar. Oblysta áleýmettik jáne quqyqtyq kómekti qajet etetin jastar da jeterlik. Sharada osy máselelerge basymdyq berilip, birqatar oılar da aıtyldy.
Al joǵary jáne orta arnaýly oqý ornyn bitirýshi stýdentterdiń aldynda da bolashaqta jumysqa ornalasý máselesi turady. Jıynda Taraz qalasy ákiminiń orynbasary Kenjebek Oljabaı men basqarma basshysy Mádı Máten jastardyń túrli máselelerine toqtalyp, naqty josparlardy usyndy. Mundaǵy negizgi basymdyq – jastardy jumyspen qamtýǵa berilip otyr. Sondaı-aq, jastardyń kásipkerlik áleýetin arttyrý da, olardyń ózin ózi jumyspen qamtýǵa baýlý da kún tártibindegi másele. Al Mádı Meıirbekulynyń aıtýynsha, bolashaqta biraz jas «Keńes berý alańy» arqyly jumysqa ornalasyp, kásibin ashyp, qoǵamǵa qyzmet etetin bolady. Sondaı-aq, «Keńes berý alańynyń» jumysyna oblys ákimdiginiń basqarmalary men memlekettik organdar qyzmetkerleri, qarjy sektorlarynyń mamandary da qatysty.
Aıta keteıik, atalǵan basqarmanyń uıymdastyrýymen ústimizdegi jyldyń aqpan-naýryz aılarynda «Elbasy Joldaýy – jańǵyrýdyń jańa kezeńi» atty oblystyq avtokerýen oblystyń barlyq aýdandarynda bolyp, keńes berý alańdaryn uıymdastyrǵan bolatyn. Atalǵan sharaǵa 14-29 jas aralyǵyndaǵy árbir aýyl, eldi mekenderdegi túrli sanattaǵy jastar qatysqan. Munda jalpy sany 3 myńǵa jýyq jasqa keńes berilgen edi.
Búginde elimizde jastarǵa arnalǵan «Dıplommen – aýylǵa!», «Serpin», «Bıznestiń jol kartasy», «Jastar praktıkasy» sııaqty iri baǵdarlamalar bar. Bul óz kezeginde jastardyń aýylsharýashylyq jáne kásipkerlik baǵyttarynda da jumys isteýine jaǵdaı jasaıdy. Al oblys ortalyǵynda ótken jıynnyń qorytyndysy boıynsha, 1000-ǵa jýyq jasqa keńes berildi. Keleshekte de jastar «Keńes berý alańy» arqyly óz máselelerin sheshe alatyn bolady.
Hamıt ESAMAN,
«Egemen Qazaqstan»
Jambyl oblysy
