Táýelsiz Qazaqstan tarıhynda tuńǵysh ret halyqaralyq dárejede uıymdastyrylǵan jıynnyń jabylý saltanatynda sóz alǵan mınıstrdiń orynbasary sharanyń mańyzdylyǵyna toqtaldy. Qarýly kúshterimizdiń Joǵarǵy Bas qolbasshysy Nursultan Nazarbaev óziniń Joldaýynda, «jastar – bizdiń úmitimiz jáne bolashaǵymyz» dep ulandarymyzǵa zor senim artady. Sol senimdi aqtaýǵa búgingi jeńis tuǵyrynan tabylǵan ár sarbaz laıyq. Olar bir aptanyń ishinde shynaıy áskerı boldy. Búgingi sapta bolashaq Saǵadattarymyz, bolashaq Talǵattarymyz turǵandyǵyna men kámil senemin. Jıynǵa ózderińiz kórgendeı, Reseı Federasııasy Orynbor prezıdenttik kadet ýchılıshesiniń tárbıelenýshileri qatysty. Qorǵanys mınıstrliginiń basshylyǵy Reseı Federasııasynyń Qorǵanys mınıstrligine jastardy tárbıeleýdegi birlesip atqaryp jatqan jumystary úshin alǵys bildiredi, – dedi Murat Maıkeev.
Sonymen qatar, jıynǵa qatysýshylardy Din isteri jáne azamattyq qoǵam vıse-mınıstri Abzal Núkenov quttyqtady.
– Bul jıynnyń tarıhı mazmuny Elbasy Nursultan Nazarbaevtyń óskeleń urpaqty áskerı-patrıottyq rýhta tárbıeleý jónindegi talaptary men tapsyrmalaryna túbegeıli jaýap bere alady. Bolashaq sarbazdardyń, qasterli Táýelsizdigimizdiń shyńdalǵan, shynyqqan qalqany bar ekendigine kóz jetkizdik. Táýelsizdik ońaı kelgen joq. Ony alý bar da saqtap qalýdyń jóni tipti bólek. Osy jaýapkershilikti tolyq túsingendikterimizdiń dáleli – búgingi jıyn, – dedi.
Shynymen de «Spassk» polıgony úsh kún boıy asqaq rýhtyń alańyna, aınymas dostyqtyń turaqty tuǵyryna kepil boldy. Saıypqyrandar saıysyp, jas sarbazdar jeńistiń dámin tatty. Jeńilgenderi jigerlerin namysqa qaırady.
Sonymen, baıraqty básekeniń «Erýdıt» saıysy boıynsha Astana qalasyndaǵy Keńes Odaǵynyń Batyry S.Nurmaǵanbetov atyndaǵy respýblıkalyq «Jas Ulan» mektebiniń aǵa serjanty Syrym Ádilbaıuly eń zııatker qatysýshy ataǵyn jeńip aldy.
Atalmysh jıynǵa qatysqan respýblıkalyq «Jas Ulan» mektepteriniń arasyndaǵy jalpy komandalyq esebi boıynsha 1-oryndy Almaty qalasyndaǵy B.Momyshuly atyndaǵy «Jas Ulan» RÁMI, 2-oryndy Qaraǵandy qalasynyń T.Bıgeldınov atyndaǵy respýblıkalyq «Jas Ulan» mektebi, al 3-oryndy Astana qalasyndaǵy S.Nurmaǵanbetov atyndaǵy respýblıkalyq «Jas Ulan» RÁMI ıelendi.
Áskerı-patrıottyq klýbtar boıynsha jalpy komandalyq esepte 3-oryndy Astana qalasynan kelgen «Búrkit» komandasy, 2-oryndy Semeı qalasyndaǵy «Jas qyran» áskerı-patrıottyq klýby, al 1-oryndy «Jetisý tarlandary» ıelendi.
– Byltyr men AK-74 qarýyn bólshekteý jáne jınaý boıynsha jarysta bir sekýndqa ǵana utylǵan bolatynmyn. Al bıyl rekord jańartyp, sol saıystan birinshi oryndy ıelendim. Jıyn – jańa tájirıbeler men jańa dostar tabýǵa taptyrmas orta, – deıdi «Búrkit» klýbynyń tárbıelenýshisi Indıra Aıtova.
Mıras ASAN,
«Egemen Qazaqstan»
Qaraǵandy oblysy
