Beıbitshilik jáne kelisim saraıy Mysyr ómirinen alynǵan opera úshin tabıǵı pıramıda retinde qoldanyldy. Sahna pıramıdanyń dál aldyna ornatylyp, alyp baǵanalar men tas músinderdiń dekorasııasy spektakldiń kórkemdigin asyrdy.
Áıgili kompozıtor Djýzeppe Verdıdiń «Aıda» operasy álemdik tanymaldyqqa ıe týyndylardyń biri. Mysyr men Efıopııada ótken tarıhı oqıǵalardy, ıaǵnı soǵysty arqaý etken týyndynyń negizgi taqyryby – mahabbat. Efıopııa patshasynyń Mysyrda kúńdikte júrgen qyzy Aıdaǵa saraı kúzetiniń basshysy Radames ǵashyq bolady. Al Radameske Perǵaýynnyń qyzy Amnerıstiń kózi túsedi. Eki ǵashyqtyń birge bolýyna kedergi keltiredi. Operada basty róldegi osy úshtikten basqa Perǵaýynnyń, abyz Ramfıstiń, Efıopııa patshasy Amonasronyń rólderi bar.
Aıdanyń rólin Qazaqstannyń eńbek sińirgen qaıratkeri Jupar Ǵabdýllına, Amnerısti Qazaqstannyń eńbek sińirgen qaıratkeri Dına Hamzına jáne Radamesti bolgarııalyq tenor Kamen Chanev oınady. Sondaı-aq, Egıpet patshasyn – Bolat Esimhanov, Abyz Ramfısti – Armenııanyń halyq ártisi Barseg Týmanıan, Aıdanyń ákesi, efıopııalyq patshany Talǵat Musabaev somdady.
– Bul merekelik spektakl EKSPO-2017 is-sharalar tizimine engizilgen. Ashyq aspan astyndaǵy opera – biz úshin aıtarlyqtaı jańa janr. Bizdiń negizgi maqsatymyz – jastardy ónerge baýlý, asqaq ónerdi nasıhattaý. Sahnalyq buıymdar zamanymyzdyń áıgili ssenografy jáne rejısser Franko Dzeffrırellıdiń úlgisi boıynsha jasaldy, deıdi uıymdastyrýshylar.
Aıta keteıik, operanyń qoıýshy rejısseri ári ssenografy – Franko Dzeffırellı (Italııa), kostıýmder boıynsha sýretshi – Maýrısıo Mıllenottı (Italııa) jáne dırıjeri – Qazaqstannyń eńbek sińirgen qaıratkeri Abzal Muhıtdınov.
Aıgúl SEIILOVA,
«Egemen Qazaqstan»
Sýretti túsirgen
Erlan OMAROV,
«Egemen Qazaqstan»
