Bıyl koreılerdiń Qıyr Shyǵystan Qazaqstanǵa qonys aýdarǵanyna 80 jyl tolady. Oǵan qosa, Qazaqstan Respýblıkasy men Koreıa Respýblıkasynyń arasynda dıplomatııalyq qatynastardyń ornaǵanyna 25 jyl tolýyna oraı tolymdy sharalar legi bastaldy.
Dostyq úıinde bastalǵan saltanatty tusaýkeserge elimizdegi koreıler ǵana emes, óńirlerdegi otandastarymyzdyń betke ustar ókilderi, árisi Seýl men Astanadan halyq óte kóp jınaldy.
Bir jaǵynan Qazaqstandy mekendeıtin koreı ultynyń aqsaqaldary bul aıtýly datany qasiretti 1937 jyldy eske alý dep qabyldaý kerek pe, álde mereke retinde atap ótken jón be degendi talqyǵa salǵan eken. Úlkender jınala kele, osy elde ósip-órkendedik, ekinshi Otanymyzdy taptyq dep uıǵaryp, úlken uıymshyldyqpen eki kúnge sozylatyn merekelik sharalar legin joǵary deńgeıde atap ótýge kelisipti.
Nátıjesi kóz aldymyzda. Osynaý bastamaǵa Qazaqstan halqy Assambleıasy da muryndyq bolyp, QHA Tóraǵasynyń orynbasary – Hatshylyq meńgerýshisi Darhan Myńbaı búkil is-sharanyń mańyzdylyǵyna toqtaldy. Ol ensıklopedııanyń avtorlary tolymdy jumys istegenin aıta kele, shırek ǵasyrǵa jýyq jasalyp jatqan ensıklopedııalar bar ekenin, biraq qolǵa tıgen «Qazaqstan koreıleri ensıklopedııasy» sapalyq, mazmundyq turǵyda daralanatynyn atady.
Aıtýly sharada talaıdy tolqytqan estelikter aıtyldy. UǴA prezıdenti akademık Murat Jurynov koreı dostary jaıly jan tebirenterlik jaqsy estelikterimen bólisip ensıklopedııa jobasynyń jetekshisi Ivan Pak bastaǵan avtorlar eki halyqtyń dostyǵy jaıly syr shertti. Tusaýkeserde Koreıanyń Almatydaǵy Bas konsýldyǵynyń bas konsýly Chjon Syng Mın bar bolǵany úsh jylda osyndaı súbeli jınaqtyń jaryq kórýimen quttyqtady.
Saltanatty jıyn barysynda deportasııalaýdyń qıyndyqtaryn bastan keshirgen jáne Qazaqstannyń damýyna úles qosqan ardagerlerge qurmet kórsetilip, kúnniń ekinshi jartysynda Respýblıka saraıynda merekelik konsert ótti.
Aınash ESALI,
«Egemen Qazaqstan»
ALMATY
