Jyl: 2017
El: AQSh , Ulybrıtanııa
Rejısser: Mettıý Von
Basty rólderde: Teron Edjerton, Kolın Fert, Mark Strong, Djýlıanna Mýr, Hollı Berrı, Pedro Paskal,Chennıng Tatým, Djeff Brıdjes, Edvard Holkroft, Hanna Alstrem jáne basqalar
Ssenarıı: Mettıý Von , Djeın Goldman
Prodıýser: Mettıý Von , Adam Bolıng , Devıd Reıd
Janr: Komedııa , Boevık
Álemdik premera: 20 qyrkúıek 2017
Qazaqstandaǵy premera: 21 qyrkúıek 2017
Jas shekteýi:R reıtıngi - 17 jasqa deıingi tulǵalar úshin eresekterdiń qadaǵalaýy mindetti
Uzaqtyǵy: 141 mınýt
«Fılmniń jalǵasyn túsirgim kele me, joq pa bilmeı júrdim, – deıdi Metıý Von. – Fılmniń kilti sanalatyn zalym beınesi uzaq oılandyrdy. Bir kúni tańerteń oıanǵanda antogonıske qatysty sıýjetter men plandar daıyn turǵanyn túsindim. Sizderge buryn-sońdy kórmegen epızodtardy kórsetýdi josparladym».
Bul - Mettıý Vonnyń rejısserlik qyzmetindegi alǵashqy sıkveli. Djýlıanna Mýr, Hollı Berrı, Djeff Brıdjes, Kolın Fert pen Elton Djon syndy bes birdeı Oskar syılyǵynyń ıegerleriniń basyn qosqan fılm kóptiń kóńilinen shyǵa aldy ma?
Fılm sıýjeti Kingsman uıymynyń amerıkalyq jaqtastarymen birlese otyryp, álemdi zulymdyqtan arashalaý jolyndaǵy qıynshylyqqa toly kúresinen órbıdi. Valentaınnyń nevralogııalyq tolqynynan álemdi qutqaryp qalǵan Eggsıdiń (Teron Edjerton) Shvesııa hanshaıymymen jarastyqtaǵy otbasylyq ómirinen bastalady. Kingsman uıymynyń bir kezdegi oqýshysy bolǵan, keýdesi óshpendilikke toly qaskóı Charlı (Edvard Holkroft) alapat kúshti kıbernetıkalyq qolǵa ıe. Ol bul kúnderi «Altyn saqına» atty esirtki bıznesimen aınalysatyn qylmystyq toptyń jetekshisi Poppı Adamstyń (Djýlıanna Mýr) senimdi jendetine aınalǵan.
Sonyń arqasynda Kingsman agentterin typ-tıpyl qyryp salady. Osy tusta buryn kıim tańdap pańdanyp júretin muntazdaı Garrı Hard (Kolın Fert) qaıta oralady. Bul joly qaı qylyǵymen súıindirmek?! Kingsman murageri Eggsı men tiri qalǵan Merlınniń (Mark Strong) ary qaraıǵy kúreske toly ómiri jeńiske bastaı ma, álde qumǵa sińgen sýdaı iz-tússiz kete me degen ekiudaı oı kórermendi jetegine qosa ilestiredi.
2014 jyly «Kingsman: Qupııa qyzmet» fılmi jaryqqa shyqqan soń, Mark Mıllar men Metıý Von fılm tabysty bolsa, jalǵasy túsirilýi múmkin ekendigin aıqan bolatyn. Fılmniń alǵashqy túsirilim jumystary 2016 jyly 15 mamyrda Bırmıngemde bastaldy. Qosymsha kadrlar osy jyly jeltoqsan aıynda Londonda túsirildi. «20th Century Fox» kınostýdııasy fılmdi 2017 jyldyń 16 maýsymynda kópshilikke usynbaq bolǵan, alaıda shyǵý merzimin 6 qazanǵa aýystyrdy. Keıin Ulybrıtanııada 20 qyrkúıekke belgilep, AQSh-taǵy tusaýkeserin eki kún alǵa ilgeriletti. Keı synshylar muny básekeden jaltarý dep sanady. О́ıtken týra sol ýaqytta kanadalyq rejısser Denı Vılnevtiń «Blade Runner 2049» fılminiń premerasy ótip jatty.
Kıno týraly synshylardyń pikiri árqıly. Sonyń ishinde «Atlantık» ádebı jýrnalynyń bas kınosynshysy Krıstofer Orr fılmniń kórkemdik tutastyǵyn sóz ete kele, «Fılm óte uzaq, tym qatal. Basqasha aıtqanda, birinshi ret – satıra, ekinshi qaıtalaý – fars» dep kınotýyndynyń mazmunyna kóńili tolmaǵanyn jetkizedi. Odan bólek fılm barysyndaǵy ersi ázilder men qaıta oralǵan Kolın Ferttiń tóbelesiniń sátsizdigi týraly ózge synshylardyń pikiri «totyqustaı taranǵan Elton Djonnyń áshekeıli keıpi de fılmdi qutqara almaıdy» degenge saıady. Rotten Tomates sholý agregatorynda fılm reıtıngine orta esepte 5,3/10 ball berilgen.
Aıa О́MIRTAI,
«Egemen Qazaqstan»
