Basqosýdyń maqsaty – Elbasy Joldaýynda aıqyndalǵan mindettemelerdi júzege asyrý barysynda el ekonomıkasyn órkendetý men aýyl sharýashylyǵy salasynyń mańyzyn arttyryp, ǵylym men óndiristiń ózara qatynasyna tyń serpin bere otyryp tájirıbe almasý. Elimizdiń agrarlyq salasyn ınnovasııalyq baǵytta keshendi damytý, ǵylymı jańalyqtardy óndiriske engizý, ınvestısııa tartý jáne aýyl sharýashylyǵyna bilikti mamandar daıarlaý máseleleri basqosýdyń negizgi ózegine aınaldy.
Mamandardyń aıtýynsha, sońǵy 10 jylda aýyl sharýashylyǵy ǵylymymen aınalysatyndardyń sany 8%-ǵa tómendegen. Buǵan sebep mamandar jasynyń ulǵaıýy, ǵalymdardyń basqa salaǵa aýysýy, jastardyń ǵylymǵa degen qyzyǵýshylyǵynyń azdyǵy bolsa kerek. «Sońǵy 10 jylda ǵylymı zertteýlerge bıýdjetten 50 mlrd. teńge bólingen. Al engizilgen ǵylymı zertteýlerdiń sany 262-ni ǵana qurap otyr. Bul kórsetkishti ulǵaıtý kerek. Qazirgi tańda aýyldyq jerlerde maman tapshy. Joǵary oqý ornyn memlekettik grantpen bitirgen túlekterdiń 50% ǵana aýyldyq jerlerde jumys isteıdi. Salanyń qyr-syryna qanyqqan básekege qabiletti bilikti kadrlar daıarlaý máselesi árdaıym basty nazarda bolýǵa tıis» deıdi, sarapshy ǵalymdar.
Jıynda talqylanǵan taǵy bir másele tehnologııalyq jahandanýdaǵy ekonomıkanyń damýy jáne óndiristegi sońǵy ǵylymı jetistikterdiń AО́K memlekettik baǵdarlamasynan kórinis tabýy. Osy rette, vedomstva basshysy Jol kartasyn iske asyrý baǵytynda kadr saıasaty júıesin jetildirý men «Bolashaq» baǵdarlamasy boıynsha mamandar daıyndaýdy jáne álemniń jetekshi ýnıversıtetterinen ǵalymdardyń tájirıbeden ótý júıesin jetildirý týraly tapsyrma berdi. Sondaı-aq Asqar Myrzahmetov Qazaq Ulttyq agrarlyq ýnıversıteti bazasyndaǵy bilim jáne óndiristiń ózara áreket alańy retinde 2016 jyly qurylǵan Agrotehnologııalyq hab jumysymen tanysty.
– Búgingi kúngi tabysty jumysymyzdyń biri dep Qazaq Ulttyq agrarlyq ýnıversıtetindegi AО́K salasyndaǵy Agrohabty aıtýǵa bolady. Transfertti tehnologııalar jobalaryn damytý AО́K úshin óte mańyzdy. Kórip otyrǵanymyzdaı Agrohab myqty ujym men ádistemesi bar jáne amerıkandyq aqparat jáne tehnologııa ortalyǵynyń basshylarymen tyǵyz qarym-qatynasta jumys atqaryp otyr – dedi Asqar Myrzahmetov.
Jıyn qorytyndysyna sáıkes, aldaǵy ýaqytta aýyl sharýashylyǵy taýar óndirýshilerdiń sanyn ósirýmen qatar, sharýalarǵa az shyǵyn shyǵarý arqyly ınnovasııalyq tehnologııalardy 10% dan 25% ǵa kóterý kózdelip otyrǵandyǵy aıtyldy.
Arman OKTIаBR,
«Egemen Qazaqstan»
ALMATY
