Buıyrtsa, aldaǵy ýaqytta dárigerlerdiń qaǵazbastylyǵy 100 paıyz sheshilip, olardyń júktemesi azaıady. Jurtshylyqtyń qolynda júrgen qaǵaz medısınalyq karta da jańa formatqa aýystyrylyp, onyń ornyna elektrondy densaýlyq pasporty paıda bolady. Bul týraly Úkimette ótken baspasóz máslıhatynda Densaýlyq saqtaý mınıstrliginiń ókilderi málimdedi.
Densaýlyq saqtaý vıse-mınıstri Alekseı Soıdyń aıtýynsha, medısına salasyn sıfrlandyrý júıesi Qazaqstan azamattarynyń densaýlyǵy týraly málimetterdi jınaqtap, biryńǵaı júıege biriktirýge negizdelgen.
Mınıstrlik 2008 jyldan beri emdeý uıymdarynyń qyzmetine júgingen halyqtyń syrqat tarıhy týraly statıstıka jasaqtapty. Endi osy statıstıkalyq málimetter sıfrlandyrý júıesiniń aıasynda azamattardyń jeke kýáligine jeke ıdentıfıkasııalyq kody (JSN) arqyly tirkelmek. Mundaı zamanaýı tirkelim júıesi dárigerlerge de, pasıentterge de tıimdi. Aıtalyq dárigerler burynǵydaı aldyna kelgen naýqastyń syrqat tarıhyn aýyzsha surap, qolmen jazyp otyrmaıdy. Azamattyń jeke kýáligindegi shtrıh-kodty kompıýterge qossa boldy, barlyq syrqat tarıhy avtomatty túrde monıtorǵa shyǵa keledi. Bul dáriger men pasıenttiń ýaqytyn anaǵurlym únemdeıdi, osy júıeniń arqasynda mamannyń naýqasty qaraý ýaqyty burynǵydaı 20-30 mınýt emes, 3-5 mınýtqa deıin qysqarady, deıdi mamandar.
Vıse-mınıstr sondaı-aq densaýlyq salasyn sıfrlandyrýǵa baılanysty dárigerlerdiń júktemesi men qaǵazbastylyǵyn azaıtýǵa, emdeý uıymdaryn kompıýterlendirýge erekshe den qoıylyp otyrǵanyn jetkizdi. Bıylǵy 1 qazandaǵy jaǵdaı boıynsha dáriger men medbıkelerdiń kompıýtermen jabdyqtalýy 78,4 paıyzdy quraıdy. 2018 jyldyń 1 qańtarynda bul máseleni 85 paıyzǵa sheship, al 2019 jyldyń basynda 100 paıyzǵa jetkizý kózdelip otyr.
Aldaǵy jyldan bastap, azamattardyń ózderi de elektrondy sıfrly qoltańba arqyly óziniń jeke elektrondy densaýlyq pasportyn ashyp kórip, ondaǵy málimettermen tanysa alatyn bolady.
Qymbat TOQTAMURAT,
«Egemen Qazaqstan»
