Baıraqty básekege toǵyzqumalaqtyń qyry men syryn jetik meńgergen kánigi sportshylarmen qatar, úmitterin úkilegen jas býyn ókilderi de bas qosty. Qatysýshylar qatarynda halyqaralyq dárejedegi 10 sport sheberi, 1 Qazaqstan Respýblıkasynyń eńbek sińirgen sport sheberi, 22 sport sheberi, 13 sport sheberligine kandıdat jáne I razrıadty dárejesi bar 11 sportshynyń bolýy báseke kórigin aıryqsha qyzdyra tústi. Nátıjesinde, baby men baǵy kelisken sportshylar jeńimpazdar men júldegerler sanatyna ilikti.
Erler arasyndaǵy synda I oryndy Astana qalasy komandasynyń quramyndaǵy sportshy Ǵalymjan Temirbaev jeńip aldy. II orynnyń júldesin pavlodarlyq Janat Qaımoldın qanjyǵasyna bókterse, onyń komandalasy Baýyrjan Abylaıhan III orynǵa taban tiredi.
Qyzdar arasynda Ońtústik Qazaqstan oblysynyń ókili Lına Kárimovanyń baǵy janyp, bas júldeni enshiledi. Onyń jerlesi Saltanat Saparbekova II orynǵa tıesili tuǵyrǵa kóterildi. Al III orynnyń júldesi pavlodarlyq Roza Raıymbekovaǵa buıyrdy.
Baǵy janyp, mereıi ósken sportshylarǵa Mádenıet jáne sport mınıstrliginiń dıplomdary men estelik medaldary tabys etilip, tıistiligine sáıkes, 500 000, 300 000 jáne 200 000 teńgeden báıge syıaqylary berildi. Budan tysqary, jeńimpazdarǵa basty júlde – arnaıy Kýbok tabystaldy.
Dúnıejúzilik jáne elimizdiń Toǵyzqumalaq sporty federasııasynyń prezıdenti Álıhan Baımenovtiń aıtýynsha, álemdegi barlyq ulttyń bolmysynyń qalyptasýyna áser etetin, olardyń árqaısysynyń tek ózine ǵana tán sport oıyndarynyń túrleri bar.
– Sondaı sıpattaǵy ulttyq oıyndar bizde de barshylyq. Kókpar, at báıgesi, toǵyzqumalaq jáne basqalary solardyń qatarynda. Olardyń biri batyldyqqa baýlysa, ekinshisi eptilikke úıretken, al úshinshisi aqyl-oı básekesine beıimdegen, – deıdi Á.Baımenov.
Toǵyzqumalaq – bizdiń ultymyzdyń álemdik órkenıetke qosqan biregeı úlesi. Qazirgi tańda osynaý zııatkerlik oıyn túrinen qurlyq deńgeıindegi chempıonattar, halyqaralyq saıystar, álem chempıonattary ótkizilýde. Bul oıynǵa qyzyǵýshylyq tanytý úrdisi kún sanap artyp keledi. Qazaqstanda 10 myń adam ár deńgeıli saıystarǵa turaqty túrde qatysyp júrse, 200 myń adam toǵyzqumalaq úıirmelerinde sheberlikterin shyńdaý ústinde.
Mıras ASAN,
«Egemen Qazaqstan»
Qaraǵandy oblysy,
Sátbaev qalasy
