Avtorlar buǵan deıin osy mazmundaǵy hatty Qorǵanys jáne aeroǵarysh ónerkásibi mınıstri B.Atamqulovqa da joldaǵan eken. Alaıda olar mınıstrlikten kelgen jaýaptyń ózderin qanaǵattandyrmaıtynyn málimdeıdi. Naqtyraq aıtqanda, mınıstrdiń jaýabynda kórsetilgen «jerdi jalǵa bermeımiz», «bul aqsha Reseı úshin emes», «aýdanǵa bólinetin 152 mln teńge qazynadan emes, ǵaryshqa jaýapty «Báıterek» kompanııasynyń qarjysynan alynady» degen ýájderdiń shyndyqqa janasymdy ekenine kúmán keltiredi. Olar: «eger jer jalǵa berilmese, 152 mln teńgeniń aýdanǵa ne úshin tólenetinin» túsinbeı otyrǵandaryn alǵa tartady. Sebebi jaýap hatta aqshanyń nege beriletini shynymen ashyp aıtylmaǵan kórinedi.
«Sonymen qatar «Báıterek» Qazaqstannyń kompanııasy bolsa, jerimizge qulaıtyn Reseıdiń zymyrandary úshin tólemdi de ózimiz tólep otyrǵan bolyp shyqpaımyz ba? Tipti, bul aqsha ótemaqy bolǵan kúnde de, ony ózimizdiń ózimizge tóleýimiz qaı qısynǵa jatady, munyń qaı jaǵy jalǵa berilgen bolmaq?» dep jazady hat avtorlary.
Torǵaılyq azamattar mınıstr B.Atamqulovtyń táýelsizdik alǵaly beri Baıqońyrdy jalǵa alǵany úshin Reseıdiń 880 mlrd teńge tólegenin aýyz toltyryp aıtqanyna kóńilderi tolmaıtynyn bildirip, bul somanyń Qazaqstannyń jyldyq bıýdjetiniń 10 paıyzyn ǵana quraıtynyn eske salady. Hat avtorlary budan ári «bizde keı jyldary bıýdjettiń tapshylyǵy 500 mlrd teńge shamalas bolyp jatady. Sonda bul bizdiń qazynamyzdyń bir jyldyq olqy tusyn ǵana jabýǵa jaraıdy eken. Al 880 mlrd teńgeni 25 jylǵa shaqsaq, bir jyldyq alashaǵymyz nebary 30 mlrd teńge ǵana bolyp shyǵady. Endeshe bul qarjy Baıqońyr ǵarysh aılaǵyna jaqyn ornalasqan eldi mekender men zymyran qaldyqtary qulaıtyn aýmaqtaǵy aýyldardyń shekken zalal-zardaptarynyń óteýi bola ala ma?», degen saýal tastaıdy.
Taǵy bir aıtarlyǵy, Qostanaı oblysynan osy joly da jer bólinedi dep otyrǵan Jangeldın aýdanynyń aýmaǵyna buǵan deıin de talaı márte zymyran bólshekteri qulap kelgen. Naqty aıtqanda, Aqtóbe oblysymen shekaralas Aqshyǵanaq aýylynyń mańyndaǵy 46 myń gektar alqap uzaq jyldar boıy osy maqsatqa paıdalanylǵan. Olarǵa kúni búginge deıin eshqandaı aqsha tólenbegen. Zymyran qulaý aýmaǵyna endi qosymsha kirgeli turǵan Aqkól jáne Qarasý aýdandarynyń turǵyndary myna habardan keıin qulaqtaryn aıryqsha túrip otyr.
Hatty joldaýshylar buǵan qosa, mınıstr B.Atamqulov kelgende, aýdan ardagerleriniń joǵaryda aıtylǵan aýdan úshin qosymsha bólinetin 152 mln teńge, Aqkól jáne Qarasý aýyldaryna járdem úshin «jedel» berilip, sý qubyry tartylatyny úshin kelisim berip, «qulap túskenderin» aıta otyryp, kúni erteń polıgonnyń mıllıardtaǵan teńgelik zııan keltirmeıtinine kimniń kepil bola alatynyn suraıdy.
Biz osy hattyń negizinde Premer-Mınıstr Baqytjan Saǵyntaevtyń atyna depýtattyq saýal joldap, bul máseleniń bizdi de tolǵandyratynyn, osyǵan qatysty birqatar jaıttardyń ózimizge de tolyq málim emes ekenin aıttyq. Sondyqtan Torǵaı óńiri ókilderi alǵa tartyp otyrǵan osy ózekti máselege oraı jan-jaqty túsindirilgen jaýap berýin kútemiz.
Murat BAQTIIаRULY,
Senat depýtaty
