Sonaý 90-shy, odan keıingi jyldarda da aýdandyq, aýyldyq jerlerde aýrýhanalar jabylyp jatty, mamandar tipti jetispedi. Sondaı qıyn kezde Qostanaı oblysynyń Fedorov aýdandyq aýrýhanasy qalypty jumys istep turdy. Qazaq KSR-niń eńbek sińirgen dárigeriniń esimi «Qazaqstan densaýlyq saqtaý salasynyń elıtasy» kitabyna engen bolatyn. Ataqty hırýrg 15 myń sátti ota jasaǵan eken, demek, 15 myń adamnyń ómirin saqtap qaldy degen sóz ǵoı. Ol dárigerler dınastııasynyń negizin qalady, balalaryn osy kúrdeli de jaýapkershiligi mol mamandyqqa tartty. Vıktor Vılgelmovıch oblys densaýlyq saqtaý salasyna sińirgen eńbegi úshin Eýropalyq ǵylymı-ónerkásiptik palatasynyń altyn medalimen marapattalǵan edi, Halyqaralyq Beıbitshilik syılyǵynyń laýreaty bolǵan. Biraq qansha adamnyń ómirin uzartqan dárigerdiń ózi ajalǵa qarsy tura almady, 2014 jyly Vıktor Fınk dúnıeden ozdy.
Vıktor Vılgelmovıch bilikti dáriger ǵana emes, aınalasyna shýaq shashyp turatyn jany taza, adam retinde de kóptiń esinde qaldy. Aýdandyq aýrýhanada Vıktor Fınkke arnap eskertkish burysh ashý týraly bastamany kótergen de ózi emdegen qarapaıym adamdar, ardagerler bolatyn.
– Vıktor Vılgelmovıchtiń eren eńbeginiń arqasynda aýdandyq aýrýhana qıyn jyldardyń ózinde qalalyq aýrýhana dárejesinde jumys istedi. Qazir onyń uldary Evgenıı men Edýard ta osy aýrýhanada ákesiniń jolyn jalǵastyryp otyr. Olar «Karl Storz» atty nemis fırmasynyń zamanaýı jańa qurylǵysymen óte kúrdeli operasııalardy jasaıdy, – dedi aýrýhana bas dárigeriniń mindetin atqarýshy Myltyqqalı Syrǵabaev.
Súıikti dárigerge arnalǵan eskertkish buryshtyń ashylýynda onyń jerlesteri, aýyldaǵy qarapaıym jandar tebirene sóıledi.
– Vıktor Vılgelmovıchpen áńgimelesýdiń ózi bir rýhanı rahatqa bóler edi. Ol kisi adam tańdamaıtyn, jurttyń barlyǵyna birdeı qaraıtyn, – deıdi Vladımır Zaverýha. Qaraqopa selosynan kelgen Valentına Drobysheva súıikti dárigerine arnap óleń jazǵan eken. Dárigerdiń dosy Sultanmájıt Sársenbaev Vıktor Vılgelmovıchtiń esimin este qaldyrý úshin kóp jumys istepti. Eskertkish buryshtan dárigerdiń ómir jolyndaǵy eleýli belesterdi kórýge bolady. Ár jyldarǵy sýretteri, qujattary, alǵan marapattarymen qatar, Vıktor Vılgelmovıchtiń ózi aǵashtan oıyp jasaǵan túrli músin-shyǵarmalary da qoıylypty. Ol ónerdi pir tutatyn.
– Tabıǵatty keremet jaqsy kóretin. Aýrýhananyń aınalasyna túrli aǵashtar otyrǵyzatyn. О́zi terip kelgen aǵash butalaryn keptirip, qoly qalt etkende jonyp, músinder jasap otyratyn, – deıdi medbıke Tatıana Kýtlına.
«Hırýrgııa – naǵyz erlerdiń isi» dep otyrady eken dáriger Vıktor Fınk kózi tirisinde. Ol osy sózin ómirinde dáleldep te ketken adam. Sodan da halyqtyń ystyq yqylasyna bólendi.
Názıra JÁRIMBET,
«Egemen Qazaqstan»
Qostanaı oblysy,
Fedorov aýdany
