10 qańtar kúni túnde ana atanǵan О́skemen qalasynyń turǵyny Valentına Konopleva bul qyzmet túrin eń alǵash paıdalaný baqytyna ıe bolyp, oǵan týý týraly kýálik saltanatty túrde tabystaldy.
Endi «Azamattarǵa arnalǵan úkimet» memlekettik korporasııasy árbir bosanǵan anaǵa quttyqtaýy jáne qyzmet túrin paıdalaný nusqaýlyǵy bar sms joldaıtyn bolady. Bul úshin áýeli perzenthana qyzmetkeri balanyń dúnıege kelgenin elektrondy júıege tirkeýi kerek. Sol kezde ata-ana uıaly telefon arqyly kelgen sms-ke jaýap berip (jaýap bergende balanyń aty-jónin jazady), qujatty kútedi. «Alys aýyldarda turatyn áıelder kóbinese qalaǵa kelip bosanatyny belgili. Olar bul qujatty birden ala almaıdy. Biraq olar sms arqyly keıin qaı jerden alatynyn kórsetýge múmkindigi bar. Máselen, óziniń turǵylyqty aýdanyn kórsetip, perzenthanadan shyqqannan keıin kelip alýyna bolady. Sonymen qatar qujatty basqa adam, máselen, kúıeýi kelip alsa da bolady. Bul úshin sms-te onyń aty-jóni men JSN-in kórsetý qajet», – deıdi oblystyq halyqqa qyzmet kórsetý ortalyǵynyń dırektory Azamat Esembolov.
Azamat QASYM,
«Egemen Qazaqstan»
О́SKEMEN
