«Astana» Prezıdenttik klýbynyń bas demeýshisi «Samuryq-Qazyna» ulttyq ál-aýqat qory, klýbtyń quryltaıshylary 51 daýysqa ıe «Samuryq-Qazyna» ulttyq ál-aýqat qory» AQ pen 49 daýysqa ıe Astana qalasynyń ákimdigi.
Sizdiń jeke qoldaýyńyzdyń jáne turaqty qarjylandyrýdyń arqasynda klýb halyqaralyq arenada joǵary nátıjelerge qol jetkizip, elorda men Qazaqstannyń oń bedelin qalyptastyryp, nyǵaıtýda.
«Astana» prezıdenttik klýby óz týynyń astyna úzdik kásibı sporttyq klýbtardy: álemdik deńgeıdegi «Astana» velokomandasy, «Astana» fýtbol klýby, «Barys» hokkeı klýby, «Astana» basketbol klýby, rallı-reıdtar boıynsha «Astana» komandasy jáne «Astana Arlans» boksshylar komandalaryn biriktirip otyr.
«Astana» klýbynyń jetistikteri búkil álemge keńinen málim.«Astana» velokomandasy – 215 jeńiske qol jetkizip, Grand-týrlarda 8 márte jeńis saltanatyn qurǵan, álemdik deńgeıde tanylyp, elimizdiń tandaýly brendine aınalǵan komanda. Veloklýbtyń quramyna «Astana» velokomandasy jáne 3 farm-klýb: qazaqstandyq sportshylardan turatyn «Astana City» qurlyqtyq komandasy jáne «Astana Track Team» trek komandasy, sondaı-aq «Astana Womens Team» áıelder komandasy kiredi.
«Astana» velokomandasynyń sportshylary Qazaqstandy Azııada nómiri birinshi etken Ulttyq quramanyń negizi bolyp tabylady. «Astana» fýtbol klýby respýblıkanyń tórt dúrkin chempıony, Qazaqstan kýbogynyń úsh márte ıegeri, qazaqstandyq fýtbol tarıhynda 2015 jyly ÝEFA Chempıondar lıgasynyń toptyq kezeńiniń jáne 2017 jyly Eýropa lıgasynyń pleı-off kezeńiniń alǵashqy qatysýshysy bolyp tabylady. Sonymen qatar Astana klýbtyq reıtıngte 452-shi orynnan 67-shi orynǵa kóterilip, biregeı jetistikke qol jetkizdi. Bul kórsetkish «Astana» klýbynyń ÝEFA reıtıngisinde elimizge upaı ákeletin jalǵyz klýb ekenin kórsetedi.
«Barys» hokkeı klýby Shyǵys Eýropanyń, Reseıdiń, Qytaıdyń jáne TMD elderiniń jetekshi komandalary oınaıtyn Qurlyqtyq hokkeı lıgasynyń pleı-off kezeńiniń turaqty qatysýshysy, sonymen qatar elimizdiń erler, jastar, stýdentter men jasóspirimder quramalarynyń bazalyq klýby bolyp tabylady.
«Astana» basketbol klýby Ulttyq lıga jáne Qazaqstan Kýbogynyń tórt márte chempıony, elimizdiń basketbol tarıhyndaǵy 2017 jylǵy Azııa chempıondary kýbogynyń alǵashqy qola júldegeri, Shyǵys Eýropa, Reseı, Qytaı jáne TMD elderiniń jetekshi klýbtarynyń basyn qosatyn VTB Birtutas lıgasynyń pleı-off raýndynyń turaqty qatysýshysy jáne tolyqqandy múshesi bolyp tabylady. Klýb azııalyq grandtar – Qatar men Iraktyń qurama komandalaryn jeńip, 2019 jyly Álem chempıonatynyń irikteý sıklyna qatysyp jatqan Qazaqstan Ulttyq quramasynyń bazalyq komandasy.
Rallı-reıdtar boıynsha «Astana» komandasy «DAKAR» transkontınenttik rallı-marafonyna qatysqan elimizdiń avtosport tarıhyndaǵy alǵashqy jáne jalǵyz komandasy, álemniń eki dúrkin chempıony, «Dakar» rallı-marafonynyń eki márte qola júldegeri, sondaı-aq tek sporttyq is-shara emes, Reseı, Qazaqstan jáne Qytaı sııaqty úsh el yntymaqtastyǵynyń strategııalyq jobasy – «Silk Way Rally 2016» atty iri halyqaralyq rallı-marafonynyń chempıony bolyp tabylady.
«Astana Arlans» boksshylar klýby – úsh dúrkin Álem chempıony jáne Dúnıejúzilik boks serııasynyń rekordsmeni. Tek qana qazaqstandyq sportshylardan turatyn «Astana Arlans» boksshylary barlyq qurlyqtarda óner kórsetip, birneshe márte álemniń úzdik boksshylary bolyp tanyldy.
«Astana» brendiniń álemge tanymaldylyǵyn eskere otyryp, «Astana» prezıdenttik klýbynyń sporttyq jobalarynyń birtutas rebrendıngi júzege asyryldy.
Endi «Astana» – Qazaqstannyń jáne elordamyzdyń bedelin halyqaralyq arenada bir ataý jáne bir logotıppen damytatyn birtutas ulttyq sport brendi.
Budan basqa, qazirgi tańda prezıdenttik klýb brendti sapaly túrde basqarý jáne menedjmenttiń sıfrly júıesin engizý jolymen bıznes-prosesterdi avtomattandyrý boıynsha jumystar júrgizip jatyr.
Bizdiń klýbtarymyzdyń bıýdjeti basqa álemdik sport jobalarynyń bıýdjetimen salystyrǵanda – eń qarapaıym, jáne ol sońǵy birneshe jyldar boıy ózgerissiz qalýda. Sonymen birge klýb shyǵyndardy ári qaraı ońtaılandyrý boıynsha josparly túrde jumys jasaýda.
Asa qurmetti Nursultan Ábishuly, Sizge jeke qoldaý kórsetkenińiz úshin taǵy da alǵysymyzdy bildirýge ruqsat etińiz.
Sizdiń quptaýyńyzben biz salamatty ómir saltyn nasıhattaýǵa jáne elimizdiń sporttyq áleýetin arttyrý úshin «Astana» prezıdenttik klýbynyń odan ári damýyna baǵyttalǵan jumystardy jalǵastyrýǵa daıynbyz.
Hatqa «Astana» velokomandasynyń bas menedjeri, Olımpıada chempıony A.Vınokýrov, «Astana» basketbol klýbynyń bas menedjeri, Olımpıada chempıony V.Tıhonenko, «Barys» HK prezıdenti A. Shopobaev, «Astana» FK prezıdenti S.Hamıtjanov, Rallı-reıdtar boıynsha «Astana» komandasynyń bas menedjeri A.Ardavıchýs, Parlament Májilisiniń depýtaty, Olımpıada chempıony, «Astana» prezıdenttik klýby Qamqorshylyq keńesiniń múshesi S.Sápıev jáne Parlament Senatynyń depýtaty, «Astana» prezıdenttik klýby Qamqorshylyq keńesiniń tóraǵasy D.Káletaev qol qoıǵan.
