Sýretti túsirgen – Erlan OMAR, «EQ»
Bıyl baıqaýǵa elimizdiń ár óńirinen kelgen 242 oqýshy qatysty. Sondaı-aq «21 NIS mektebi» men «International Steppe School of Astana» mektebi de baq synady. Mazmundy is-shara shymyldyǵyn dástúrli ánshi, Qazaqstannyń Eńbek Eri, professor Qaırat Baıbosynov ashty.
Festıval mıýzıkl, áleýmettik beınerolık, Sand Art jáne qolóner baǵyttary boıynsha ótti. Máselen, mıýzıkl shartynda oqýshylar óner men tehnologııany sheber úılestirip, jasandy ıntellektini paıdalaný arqyly sahnalyq qoıylymdar usyndy. Sonymen qatar qazaq halyq ertegileri, ańyzdary jáne klassıkalyq shyǵarmalary da zamanaýı úlgide kórinis tapty.
Áleýmettik beınerolıkterde oqýshylar qoǵam aldyndaǵy jaýapkershilik, eriktilik, azamattyq belsendilik pen adamgershilik qundylyqtardy arqaý etip, óz oılaryn jańa formatta jetkize bildi.
Al «Sand Art» baǵytynda jas talanttar «Zııatkerlik mektep oqýshylaryna oqýǵa usynylatyn 100 kitap» jobasyna engen shyǵarmalardy qum betinde beıneledi. Salynǵan ár týyndy belgili bir oqıǵany baıandap, ádebı týyndylardy jańa qyrynan tanytty.
Jobaǵa qatysýshy Nazym Álimbekova qumǵa sýret salý ónerimen alǵash aınalysa bastaǵanda, onyń qupııasyn ańdaı almaǵan. Alaıda ýaqyt óte kele ol bul ónerdiń erekshe qyryn tanyp, erkindik pen shabyt alǵanyn aıtady.
Al qolóner baǵyty ulttyq qundylyqtar men sheberlikti kórsetetin alańǵa aınaldy. Qatysýshylar aǵashtan, matadan, teriden, saz balshyqtan, monshaqtan jasalǵan buıymdardy usynyp, ultymyzdyń baı mádenı murasyn dáriptedi. Keste tigý men kanzashı tehnıkasynda oryndalǵan jumys ta kópshiliktiń qyzyǵýshylyǵyn týdyryp, jastardyń talanty men shyǵarmashylyq izdenisin aıqyn kórsetti. «Men úshin bul art-festıval tek qana elimizdegi NIS mektepteri toǵysatyn shara ǵana emes, birlik pen yntymaqtastyq nyǵaıatyn orta. Sonymen qatar balalardyń qabiletin ashýǵa, óz ónerin kórsetýge múmkindik beretin shyǵarmashylyq alań», deıdi 7-synyp oqýshysy Saıat Hımedenov.
Baıqaý qorytyndysynda ár baǵytta úzdik jumystar anyqtalyp, jeńimpazdardy óner maıtalmandary marapattady.
Farıza IZBASAROVA,
L.N.Gýmılev atyndaǵy Eýrazııa ulttyq ýnıversıtetiniń 2-kýrs stýdenti
