Petropavl qalasynda Nurlybek Nálibaev transformatorlar men elektrotehnıkalyq jabdyqtardyń quramdas bólikterin óndirýge mamandanǵan «Petropavl elektrotehnıkalyq zaýytyna» bardy. Jobanyń jalpy quny 10 mlrd teńgeni quraıdy. Kásiporynda 200 jańa jumys orny ashylǵan. О́ndiris qýaty jylyna 13 myń dana ónim shyǵarýǵa múmkindik beredi.
Sonymen qatar Premer-mınıstrdiń birinshi orynbasary óńirdegi temirjol jyljymaly quramyn óndiretin iri mashına jasaý kásiporyndarynyń biri «ZIKSTO» JShS qyzmetimen tanysty. Byltyr munda jalpy aýmaǵy 12 myń sharshy metrdi quraıtyn jańa zaýyttyń qurylysy aıaqtalyp, robottandyrylǵan zamanaýı tehnologııalyq jeli iske qosylǵan. Jobanyń jalpy quny 25 mlrd teńgeni qurady, 300 jańa jumys orny ashyldy.
Buǵan qosa N.Nálibaev CLAAS aýyl sharýashylyǵy tehnıkasyn qurastyrý zaýyty, «Maslo-Del» JShS maı ekstraksııalaý zaýyty, «Zelenyı Sever» JShS jylyjaı kesheni men «Petropavl aýyr mashına jasaý zaýyty» AQ-da boldy. Atalǵan jobalar óńirdiń ónerkásiptik jáne agroónerkásiptik áleýetin nyǵaıtýǵa, shıkizatty tereń óńdeýge baǵyttalǵan.
Sapar barysynda energetıkalyq qaýipsizdik máselelerine de erekshe nazar aýdaryldy. Petropavl JEO-2 nysanynda Premer-mınıstrdiń birinshi orynbasary 2026–2027 jyldardaǵy jylytý maýsymyna daıyndyq, jóndeý men ınvestısııalyq baǵdarlamalardyń júzege asyrylý barysymen tanysty. Kásiporynnyń bas dırektory Anatolıı Kazanovskııdiń aıtýynsha, 2022 jyly kásiporynda 103 tehnologııalyq buzýshylyq tirkelgen. Aýqymdy jóndeý baǵdarlamalarynyń nátıjesinde 2024–2025 jyldary bul kórsetkish 55-ke deıin tómendedi, al ótken jylý berý maýsymynyń qorytyndysynda tek 23 jaǵdaı tirkeldi. Qazir jańa jylytý kezeńine daıyndyq qarqyndy júrgizilip jatyr. Byltyr ınvestısııalyq baǵdarlamanyń kólemi 15 mlrd teńgeni qurasa, bıyl bul maqsatqa 16,2 mlrd teńge qarastyrylǵan.
Nurlybek Nálibaev Petropavl qalasyndaǵy Ýnıversalnaıa kóshesindegi jol ótkeli qurylysynyń jobasymen de tanysty. Búginde nysan 90%-ǵa daıyn. Budan bólek, Premer-mınıstrdiń birinshi orynbasary Pestroe kóli jaǵalaýyndaǵy eko-parkke bardy. Joba rekreasııalyq ınfraqurylymdy damytýǵa, ishki týrızmdi qoldaýǵa, qalalyq ortanyń sapasyn arttyrýǵa baǵyttalǵan.
«Eko-park – turǵyndar men balaly otbasylar úshin qolaıly demalys orny. Munda velojoldar men jaıaý júrginshiler aımaqtary qarastyrylyp, halyqtyń jaıly demalýyna barlyq jaǵdaı jasalǵan. Memleket basshysy atap ótkendeı, qalalar taza ári ómir súrýge qolaıly bolýǵa tıis. Petropavlda halyq ıgiligi úshin aýqymdy jumystar atqarylýda. Endigi mindet – jobany sapaly aıaqtap, osyndaı bastamalardy júıeli túrde jalǵastyrý», dedi N.Nálibaev.
Odan keıin Nurlybek Nálibaev Novonıkolskoe aýylyndaǵy «Zenchenko ı K» KS-niń zamanaýı taýarly sút fermasyna bardy. Zamanaýı nysan 8 myń basqa arnalyp «Karýsel» qondyrǵysymen jabdyqtalǵan. Jobanyń jalpy quny 9 mlrd teńgeni quraıdy. Al óndiris orny bıyl tamyz aıynda iske qosylady dep josparlanyp otyr.
Búginde «Zenchenko ı K» KS bıznestiń áleýmettik jaýapkershiliginiń úlgisin kórsetip keledi. Kásiporyn qarajaty esebinen Novonıkolskoe aýylynda turǵyn úıler men áleýmettik nysandar salynyp jatyr. Keıingi bes jylda áleýmettik jaýapty bıznes aýyl turǵyndarynyń ál-aýqatyn arttyrý maqsatynda 3,2 mlrd teńgeden astam qarjy baǵyttady.
Atalǵan jobalardyń júzege asyrylýy Soltústik Qazaqstan oblysynyń ónerkásiptik ári agrarlyq áleýetin nyǵaıtyp, jańa jumys oryndaryn ashýǵa, ınfraqurylymdy jańǵyrtýǵa, halyqtyń ómir súrý sapasyn jaqsartýǵa múmkindik beredi.
