– Mektepterdiń materıaldyq-tehnıkalyq bazalaryn jańartýǵa 2018 jylǵa 1 mlrd 200 mln teńge bólindi. Barlyq aýdanda robot-tehnıka kabınetteri ashylady. Fızıka kabınetteri jańǵyrtylady. Elbasy Joldaýynda sıfrly tehnologııany damytý, keń jolaqty ınternetpen qamtý jáne mektepterdi beınequrylǵylarmen jabdyqtaý jumystaryna erekshe mán berilgen, osy maqsatta Atyraý oblysynda da jumystar jalǵasady, – dedi Nursáýle Saılaýova.
Qazir oblystaǵy 193 mekteptiń 141-i keń jolaqty ınternetke qosylǵan. Shalǵaı eldi mekenderde ornalasqan 21 shaǵyn jınaqty mektep ınteraktıvti quraldarmen jabdyqtalyp, Atyraý qalasynyń 10 mektebinde «Robot-tehnıka» kýrsy qanatqaqaty joba retinde bastaý aldy.
Qazaqstan halqy Assambleıasynyń Atyraý oblystyq fılıaly men Munaı jáne gaz ýnıversıteti uıymdastyrǵan dóńgelek ústelde Elbasy Joldaýynda aıtylǵan adamı kapıtaldy damytý jaıy keńinen talqylandy. Ýnıversıtet rektory Álı Ábishev kásiptik bilim berý baǵdarlamalaryna ózgerister engizilgenine jáne tájirıbe almasý úshin shetelderden mamandar shaqyrylǵanyna toqtaldy. Oblystyq ishki saıasat basqarmasynyń basshysy Jasulan Bısembıev Memleket basshysynyń sıfrly bilim berý resýrstaryn damytý týraly tapsyrmasyn oryndaýǵa aımaqta múmkindik kóp ekenin baıandaı kele, «Memlekettik qyzmet kórsetý de elektrondy túrge kóshýde. Búgin bizde TMD elderinde qoldanysta joq Egov.kz júıesi jumys isteıdi. Kompıýterde ǵalamtor jelisin paıdalanýdy úırený úshin «Internet – siz úshin!» jobasy da bar. Osyndaı jaǵdaıdy paıdalana otyryp, árbir adam sıfrly tehnologııany tolyq meńgerýge umtylýy kerek. Bul – zaman talaby», dedi.
Sharada Assambleıa músheleri de Elbasy Joldaýyna qoldaý bildirdi.
– Qandaı mindetti iske asyrsaq ta, bizdiń basty kúshimiz birlikte bolýy kerek. Elbasynyń qazaq, orys, aǵylshyn tilderin jetik meńgerý kerektigi jaıly aıtqany kókeıime qonady. Joldaýmen tolyq tanysyp shyqtym. Qazaq eliniń qaryshtap damýy jolynda bárimiz bir úıdiń balasyndaı atsalysýǵa tıispiz, – deıdi «Thonıl» koreı etnomádenı birlestiginiń jetekshisi Lıýdmıla Lı.
Baqytgúl BABASh,
«Egemen Qazaqstan»
ATYRAÝ
