Agrarlyq óńir úshin bul naǵyz kerekti qural ekeni aıtpasa da túsinikti. Sondyqtan da ony aqmolalyq kásiporynnyń óndiristik qýatymen qurastyryp-jınaý jolǵa qoıylmaq. Jergilikti jerdiń klımattyq jaǵdaıyna beıimdelip jasalatyn «Amity» kesheniniń alǵashqy partııasyn qurastyrý bıyl naýryz aıyna josparlanǵan. Búgingi tańda atalǵan qurylǵynyń 12 danasyn qurastyrýǵa arnalǵan quny 1,5 mıllıon AQSh dollary turatyn kerek-jaraqtaryn satyp alý kelisimsharty jasalǵan. Kásiporynnyń bas dırektory Oleg Balybınniń paıymdaýynsha, osy tektes ınnovasııalyq jobalardy júzege asyrý nátıjesinde naryqty joǵary tehnologııaly qural-jabdyqtarmen qamtýǵa yqpal etip, óńirdegi agroındýstrııa áleýetin arttyrýǵa jáne aýylsharýashylyq tehnıkalaryn jańǵyrtýǵa jol ashylady. Jalpy, «Qazaqstan Agro Innovasııalyq Korporasııasy» JShS zamanaýı kópsalaly aýylsharýashylyq, arnaıy jáne kommýnaldy tehnıkalardy shyǵarýshy kásiporyn sanalady.
Búgingi tańda zaýytta 78 adam jumys isteýde. Atalǵan kásiporyn jylyna «PVP-351», «SHABYN» jınaý-presteý tehnıkasynyń 200 danasyn, «PR-F-145» «SHABYN» tehnıkasynyń 600 danasyn, budan basqa aspaly jer jyrtý quralynyń 150 danasyn jáne ózge de qural-jabdyqtardy shyǵara bastaǵanyn aıta ketý kerek. Arzan da sapaly tirkemeli jáne aspaly aýylsharýashylyq tehnıkalaryn shyǵarýǵa bel býǵan zaýyt elimizdiń ózge de óńirlerindegi kásiporyndarymen baılanys ornatýǵa múddeli. О́z ónimderin elimizdiń kez kelgen óńirine jetkizip berýge de ázir ekendikterin bildirip otyr. Onyń ústine qazirgi tańda aýyl sharýashylyǵyn damytý maqsatynda zamanaýı jańa tehnıkalar men qural-jabdyqtarmen qamtamasyz etýge jáne mashına jasaý salasyn damytýǵa arnalǵan memlekettik baǵdarlama júzege asyrylýda. Bul rette quramyna memleket pen kvazımemlekettik sektor jáne aýylsharýashylyq tehnıkalary men qural-jabdyqtaryn óndirýshi kásiporyn ókilderi kirgen jumys toby jumys isteýde.
Sonymen birge elimizdiń mashına-traktor parkin jańartý baǵytynda birqatar qadamdar jasalyp jatyr. Aýylsharýashylyq mashınalaryn jasaý jol kartasy da ázirlengen. Atalǵan jol kartasy qolda bar óndiris qýatyn arttyrýmen qatar, jańa ónim túrlerin shyǵarýǵa da múmkindik beredi dep kútilýde. Jáne de sharýalardy sheteldik nusqalardan birde-bir kem emes otandyq sapaly da arzan tehnıkalarmen qamtamasyz etýi tıis.
Osy jumystardyń barlyǵy Elbasynyń bıylǵy Joldaýynda aıtylǵan «Aqyldy tehnologııalar» – agroónerkásip keshenin qarqyndy damytý múmkindigi» atty úshinshi mindetpen ushtasyp jatyr. Shıkizatty qaıta óńdep, álemdik naryqtarǵa joǵary sapaly daıyn ónimmen shyǵý – ýaqyt talaby. Onyń ústine bıyldan bastap aýylsharýashylyq tehnıkalaryn satyp alýdy sýbsıdııalaýda basymdyq eń aldymen otandyq ónim ónimdirýshilerge beriletin bolady.
Asqar TURAPBAIULY,
«Egemen Qazaqstan»
Aqmola oblysy
