Búginde óner adamdaryn «juldyz» ataý sánge aınalyp ketkendeı. Kóp tyńdarmannyń Almatyda alshań basyp júrgenderdiń bárin solaı qabyldaıtyny belgili. Ánderdiń arasynda sońǵy kezderi hıt uǵymy da paıda boldy. Alaıda el ishinen shyǵyp, sol elde qalyp qoıǵan shynaıy óner adamdaryn kópshilik bile qoımaıdy. Sol hıt ánderińizdi kimderdiń jazǵanynan da kópshilik beıhabar. Al aýylda qalyp, eleýsiz kún keship jatqan talanttardyń taǵdyry solaı jumbaq kúıde qala beredi.
Manarbek Qoıshybaev Sarysý aýdanynyń О́ndiris aýylynda týǵan. Jastaıynan ónerge qushtar ol bala kúninen-aq túrli aspaptarda oınap, óziniń talantyn tanytady. Tipti oblystyq, respýblıkalyq deńgeıdegi baıqaýlarǵa da qatysyp, júldeli bolady. Manarbektiń talantyna bas ıgen aýyldastary onyń aýdandyq «Saryarqa» ansamblinde óner kórsetken jyldaryn juldyzdy shaǵy dep esepteıdi. Sahnanyń úlken-kishisi bolmaıdy desek te, Manarbek úlken sahnalarda óner kórsetýdi armandaıdy. Ol úshin Almaty qalasyna baryp, joǵary oqý ornyna túsýge nıettenedi. Biraq taǵdyrdyń buıryǵy ony Almatyǵa aparmaı, ata-anasyna qaraılap, aýylda qalady. Báribir boıyndaǵy óneri tynshý bermegen Manarbek Qoıshybaev keıin Ońtústik Qazaqstan oblysynyń Sozaq aýdanyndaǵy naǵashylarynyń qolyna baryp, jıyrmadan endi ǵana asqan shaǵynda «Shý ólke» mýzykalyq ansamblin qurǵan. Sol kezde ol búginde tanymal ánshi Sáken Maıǵazıevti ansambl quramyna alyp, birlese óner kórsetken eken. Sáken Maıǵazıevtiń de talaı suhbattarynan Manarbek Qoıshybaev esiminiń qurmetpen atalatynyn oqyǵan edik. Sákenniń «Kishkene kezimnen soqpaly aspaptarda oınaǵandy unatýshy edim. Aýylda júrgende gıtarada da, dombyrada da oınadym. Maǵan ustazdyq etken aǵalaryma rahmet aıtamyn. Manarbek Qoıshybaev, Maqash Tasybaev degen aǵalarym kóp nárseni úıretti», degen sózderinen de Manarbek talantyn tanýǵa bolatyndaı.
Aýylda qalǵan talant ıesi án shyrqaýmen birge, sazgerlik qabiletiniń bar ekenin de tanytty. Eshqashan ataq pen dańqqa qumartpaı, qarapaıym tirshilik keship kele jatqan Manarbek Qoıshybaevtyń qońyr ánderi búginde álgi biz aıtqan hıt ánderge aınaldy. Mysaly, Sáken Maıǵazıevtiń oryndaýyndaǵy «Aqqýlardyń armany» ániniń ózi úılesimin tapqan ǵajap án. Al jastar arasynda keń tanylyp, bir kezde ol ánsiz toı ótpeıtin bolǵan Áıgerim Qalaýbaevanyń «Telefonym shyryldasa sen deımin» ániniń ózi tyńdarman júreginde. Budan bólek, onyń «Qara shańyraq», «Shýdyń boıyn mekendegen bir elik», «Jol ótken», «Jıen bala» atty ánderi bar.
Biz ónerge adaldyq jaıly kóp aıtamyz. Shyn máninde ónerge adaldyq degenniń ózi boıdaǵy talantty aıalap ustaý ǵoı. Aýylda qalsa da, úlken sahnalarda óner kórsetpese de Manarbek Qoıshybaevtyń ónerge adaldyǵy súısintedi. О́ziniń qońyr ánderimen kópshiliktiń júreginen jol tapqan óner ıesin búginde kópshilik bile qoımaıdy. Endi Sarysý aýdanynyń ákimshiligi qoldaý kórsetip jatsa, ol shyǵarmashylyq keshin ótkizgisi keletinin de jasyrmaıdy. «El ishi – óner kenishi» deıdi ǵoı qazaq halqy. El ishinde osyndaı azamattardyń bolǵany qýantqanymen, olarǵa degen qurmettiń der kezinde kórsetile qoımaıtyny oılandyrady. Biraq tirshilik aǵynymen týǵan jerinde qalǵan talanttyń tuǵyry qashanda bıikte.
Hamıt ESAMAN,
«Egemen Qazaqstan»
Jambyl oblysy
