Kórmeniń ashylý saltanatyna qatysqan Qazaqstan Respýblıkasy Premer-Mınıstriniń orynbasary Asqar Jumaǵalıev elimiz ınnovatorlarynyń stendine jáne usynylǵan konsepsııaǵa joǵary baǵasyn berdi. Stend jumysymen kórmeniń alǵashqy saǵattarynan bastap álemdik telekompanııalardyń basshylary, Azııa jáne Eýropa mobıldi operatorlarynyń ókilderi, baǵdarlamalyq jasaqtama jáne qondyrǵylar óndirýshiler, kongreske qatysýshylar tanysa bastady. Jyl saıyn kórmege álemniń 200 elinen 100 myńǵa jýyq adam jınalady. Atalǵan shara mobıldi jáne sıfrly tehnologııalar salasynda aıtýly bolyp tabylady, ol trendter men ınnovasııalyq sheshimderdi usynatyn álemdik alań mindetin atqarady. Kompanııalar dástúrli túrde jańa gadjetterdi, qosymshalardy, qondyrǵylar men tehnologııalyq sheshimderdi usynyp keledi.
Kórmede Qazaqstan stendi men tehnologııalyq jetistikterin iri mýltıservıs operatory «Qazaqtelekom» AQ usyndy. Kompanııa basshysynyń aıtýynsha, 4 kún boıy mańyzdy strategııalyq jáne iskerlik kezdesýlerin, mobıldi jáne ınnovasııalyq tehnologııalar salasyndaǵy halyqaralyq lıderlermen kelissózder ótkizýdi uıymdastyrý josparlanǵan.
Kórmege qatysýshylar Qazaqstanda smart home, smart city tujyrymdamalary aıasynda engizilip jatqan aqparattyq kommýnıkasııalar salasyndaǵy ınnovasııalyq servıstermen jáne tehnologııalarmen, atap aıtqanda, jylý energııasynyń datchıkteri, energııa jáne sýdy tutynýdy uıymdastyrý shemalary men júıeleri, qaladaǵy jaryq jáne avtoturaqtar datchıkteri, beınebaqylaý júıeleri sııaqty kóptegen jobalarmen tanysý múmkindigine ıe. Budan tys, stend qonaqtaryna Qazaqstannyń operatordyń ınfraqurylymy, tehnologııalyq jelileri, eldiń erekshe tabıǵat landshaftylary men kórneki jerleri kórsetilgen biregeı vırtýaldy kartasy usynyldy.
«Egemen-aqparat»
