Kezinde KSRO men Japonııa arasynda qyrǵı-qabaq soǵys tutanǵanda tap osy Anıvadaǵy koreıler Qazaqstanǵa jer aýdarylǵan eken. Keńes ókimeti olarǵa senbegen.
– Bizdiń ata-babalarymyzdy búkil Sibirdiń ústimen tozyǵy jetken eshelonǵa tıep Qazaqstanǵa jetkizipti, – deıdi Ońtústik Qazaqstan oblysyndaǵy koreı etnomádenı ortalyǵynyń tóraıymy Svetlana Pak. – Beımaral, daıyndyqsyz júrgen jerinen ustap, qarýmen qorqytyp eshelonǵa qamaǵan aǵaıyndarymyzdyń jartysy jolda ashtyq pen sýyqtan qyrylyp, súıekteri shashylyp qaldy. Qazaq jerine osylaı keldik. Ata-analarymyz «senderdiń ómirleriń úshin qazaq halqyna qaryzdarmyz» degendi jıi aıtatyn. Jas boldyq, mánin kóp túsinbeppiz. Biz ǵana emes Qazaqstanǵa aıdaýmen kelgen barlyq etnos ókilderi osy azapty bastan keshirdi. Baýyrmal qazaq halqynyń arqasynda aman qaldyq. Qazaqstan – bizdiń ortaq Otanymyz. Sondyqtan da júrek qalaýymyzben Qazaqstan halqy Assambleıasy atynan «Qazaq halqyna myń alǵys» monýmentin ornattyq. Bul ash-jalańash, azyp-tozyp kelgen túrli etnosqa qushaǵyn ashqan, qolyndaǵy jarty nanyn bólip berip, úıiniń tórinen oryn bergen qazaq ultyna qurmetimiz.
Tap osyǵan maǵynalas pikirlerdi Qap taýynan jer aýdarylǵan aǵaıyndar da júrekteri jylap turyp aıtady.
Ataýly data qarsańynda oblys ákimi Janseıit Túımebaev merekelik sharalardy jańa mazmunda ótkizýge bastamashy boldy. Is-shara 10 kúndi qamtıdy.
Bul týraly OQO óńirlik kommýnıkasııalar qyzmetinde ótken brıfıngte oblys ákimi apparaty assambleıa hatshylyǵynyń meńgerýshisi Muratáli Qalmuratov habardar etti.
Onyń aıtýynsha, on kúndik merekeni jer-jerlerde uıymdastyrý men ótkizýdiń tujyrymdamasy ázirlenip, ár kúnge arnaıy ataýlar berilgen.
Aldaǵy ýaqytta Ońtústik Qazaqstan oblysynyń tolyqqandy jańarǵan etnokartasy daıyndalyp, óńirdegi assambleıa qyzmeti týraly kitap ázirlenetin bolady. Sondaı-aq bıyl bes aýdan, qala aýmaǵynda «Dostyq» úıleri ashylady. Oblys basshysynyń tapsyrmasyna sáıkes, «Ár etnostyń brendi» jobasy aıasynda assambleıa alańynda turaqty sheberlik dáristeri men ashyq kórmeler uıymdastyrylmaq.
Baqtııar TAIJAN,
«Egemen Qazaqstan»
Ońtústik Qazaqstan oblysy
