Kezdesýdiń bir demde, jeńil lepte ótýine óńirimizdegi irgeli oqý oryndarynyń birine jaqynda ǵana taǵaıyndalǵan Muhtar Ádilbekulynyń: «Qysylmańyzdar. Emin-erkin pikir almasaıyq. Ýnıversıtettegi túıindi máselelerdi birlese talqylaıyq» degen sózi de túrtki bolǵany anyq. Baıqaǵanymyz, stýdentterdiń kóńilin alańdatyp júrgen máseleler az emes eken. Stýdent Ádil Qabanbaev ýnıversıtette ártúrli baıqaýlar uıymdastyrylǵanymen, sol baıqaýǵa ázirlenetin jerleriniń jóndi bolmaı turǵanyn, №3 oqý ǵımaratynyń terezelerinen jel úrlese, №2 oqý ǵımaratynda ashananyń joqtyǵynan ózderiniń keı kúnderi ash qursaq júrip qalatynyn jetkizdi. Oqý ornynyń jýrnalıstıka mamandyǵynyń stýdenti Jadyra Májibaeva óziniń №3 jataqhanada turatynyn, alaıda jataqhanada stýdentterge ortaq as pisiretin bólme joqtyǵyn, árkim óz bólmesinde eski toq peshterdi qosatyndyǵyn, sonyń kesirinen keıde órt shyǵatyndyǵyn, jýynatyn bólmeniń de jaǵdaıy sonshalyqty máz emes ekendigin, kir jaıaýǵa arnalǵan bólme bola tura, onyń paıdalanýǵa berilmeı otyrǵandyǵyn aıtty.
Al stýdent Dáýletberdi Jekeı memleketaralyq deńgeıde sheshiletin salmaqty máseleni ortaǵa tastady. «2015 jylǵa deıin Mońǵolııanyń Baıan-О́lgıı aımaǵynda bizdiń ýnıversıtettiń fılıaly jumys istep turǵan edi. Sol arqyly osy jaqqa 100-den astam qazaq jasy oqýǵa kelip turatyn. Búginde bul bólimshe jabyldy. Bólimsheni qaıtadan ashyp, qazaq jastaryn oqýǵa tartý oılaryńyzda bar ma? Ekinshi saýalym, jataqhanadaǵy ata-anasynyń qamqorlyǵynsyz qalǵan balalardyń jaǵdaıy ne bolmaq? Olar buryn tegin turyp kelse, bıyl aqysyn tóleı bastaǵan eken», - dedi ol.
Sonymen qatar kezdesýde «Dilmar» debat klýbynyń jetekshileri Araılym Panabek pen Ádil Manapbaı, «Avangard» stýdentter teatrynyń jetekshisi Nıkıta Derıabın ózderiniń daıyndalatyn aýdıtorııalarynyń, ýnıversıtet janynan qurylǵan joǵarǵy kolledj stýdentteriniń voleıbolshylary jarysqa ázirlenetin sport zalynyń joqtyǵyn alǵa tartty. Stýdentterdiń suraqtaryn muqııat tyńdaǵan ýnıversıtet rektory kóterilgen máselelerdiń oryndy ekendigin atap ótip, árqaısysy óz retimen sheshim tabatyndyǵyn atap ótti. Sonymen qatar sáýir-mamyr aılarynda arnaıy delegasııamen Mońǵolııaǵa barýdy josparlap otyrǵanyn sóz etip, Baıan-О́lgııdegi bólimshe máselesi sol kezde talqyǵa túsetinin tilge tıek etti.
Azamat QASYM,
«Egemen Qazaqstan»
О́SKEMEN
