Basqosýǵa oblys ákiminiń orynbasarlary, basqarma basshylary, zııaly qaýym ókilderi, oblystyq, qalalyq jáne aýdandyq ardagerler keńesiniń tóraǵalary qatysty.
Jıynǵa tóraǵalyq etken óńir basshysy ótken jyldyń qorytyndysy boıynsha oblysymyzdyń qylmys sanyn halyq sanyna shaqqanda 0,3 paıyzben respýblıkada eń sońǵy 16 - orynda ekenin aıtyp, endi taǵy da tómendetýge jumys isteý kerektigin jetkizdi.
«Búkil Qazaqstannyń halqy 18 mıllıon bolsa, osynsha halyq keıbir damyǵan memleketterdiń bir ǵana qalasynda ómir súredi. Olar mádenıetti táp-táýir, tatý-tátti ǵumyr keship jatyr. Al, biz keıde ulanǵaıyr atyrapqa syımaı jatamyz. Olaı bolmaıdy. Yntymaqpen, baýyrmaldyqpen, tatýlyqpen ǵumyr keshýimiz kerek. Sonda ǵana órkendegen elderdi qýyp jetemiz. Bizde de bir el, bir basshy bar. Endeshe elde bir jaǵadan bas, bir jeńnen qol shyǵaryp, birlese otyryp memlekettik baǵdarlamalardy oryndaý jolynda aıanbaı eńbek eteıik», – dedi Janseıit Qanseıituly.
Oblys ákiminiń sózin qýattaǵan zııalylar qazirgi tańda, jalpy qoǵamymyzda bala tárbıesine degen jaýapkershiliktiń álsirep bara jatqanyn jasyrmady. El aǵalary yntymaq pen bereke bolmaǵan jerge qut qonbaıtynyn aıtty.
«Kúndelikti kúıbiń tirshilikpen arpalysyp júrip qazirgi ata analardyń bala tárbıesine nemquraıly qaraý saldarynan osyndaı jaǵymsyz jaǵdaılar oryn alyp, kórshi turyp, bir-birimen sottasyp jatqandar da bar. Mine, bul máselelerde árbir aýyldaǵy ardager aǵalar, aýyl bıleri men zııaly qaýym ókilderiniń atqaratyn jumysy orasan bolmaq. Istep te júr, biraq áli de jetkiliksiz. Sizder óz aýyldaryńyzda osyndaı jaǵdaılardy boldyrmaý maqsatynda birigip, jastarǵa aqyl aıtyp, toqtaý salyp otyrsańyzdar», – dedi oblystyq ardagerler keńesiniń tóraǵasy Jeńisbek Máýlenqulov.
Jıyn sońynda aımaq basshysy «Zorlyq-zombylyqsyz – Ońtústik» aksııasyn bastaýdy jón sanaıtynyn aıtty. Osy aksııa aıasynda barsha aýdan, qala ákimdikterine zorlyq-zombylyqtyń, qylmys pen quqyqbuzýshylyqtyń aldyn alý boıynshe keshendi jumystardy uıymdastyrýdy tapsyrdy. Aǵa býyn, zııaly qaýym ókilderin de osy bastamaǵa qoldaý kórsetip, belsendi jumys isteýge shaqyrdy.
Ǵalymjan Elshibaı,
«Egemen Qazaqstan»
Ońtústik Qazaqstan oblysy
