Atalmysh is-sharaǵa elimizdiń tarapynan teń tóraǵa Eńbek jáne halyqty áleýmettik qorǵaý mınıstri Mádına Ábilqasymova men Mońǵolııa tarapynan teń tóraǵa osy eldiń Eńbek jáne halyqty áleýmettik qorǵaý mınıstri Sodnamın Chınzorıg, sonymen birge qos eldiń ortalyq memlekettik organdarynyń ókilderi qatysty.
Úkimetaralyq komıssııa otyrysynda saýda, ekonomıka, ınvestısııa, kásipkerlik, jer qoınaýyn paıdalaný, aýyl sharýashylyǵy, qorshaǵan ortany qorǵaý, mádenıet, bilim berý jáne ǵylym, densaýlyq saqtaý, quqyqtyq bazany damytý, halyqty áleýmettik qamsyzdandyrý sııaqty salalardaǵy yntymaqtastyqty nyǵaıtý joldary talqylandy.
Jalpy, Qazaqstan men Mońǵolııa tarıhı tájirıbege baı, mádenı ári gýmanıtarlyq baılanystary ornyqqan, sondaı-aq salt-dástúri jaǵynan da uqsastyqtary kóp elder. Budan bólek, Qazaqstan men Mońǵolııa arasynda senim men ózara ortaq múddeli qaǵıdalar jaǵynan da turaqty ári syndarly qarym-qatynastar ornaǵan.
Kezdesýdi elimizdiń Eńbek jáne halyqty áleýmettik qorǵaý mınıstri M.Ábilqasymova ashyp, Mońǵolııa Qazaqstanmen dıplomatııalyq qarym-qatynas ornatqan alǵashqy memleketterdiń biri ekenin erekshe atap ótti.
«Biz Mońǵolııa tarapynan bolǵan zeınetaqymen qamsyzdandyrý salasyndaǵy ekijaqty yntymaqtastyqty jalǵastyrýdy jáne osy joba boıynsha bastalǵan tıisti úkimetaralyq kelisimdi daıyndaý úderisin bıyl iske asyrýdy qoldaımyz», dedi M.Ábilqasymova.
Keleli kezdesýdegi mańyzdy máselelerdiń biri Monǵolııa men Eýrazııalyq ekonomıkalyq odaq arasyndaǵy yntymaqtastyq sheńberinde eki el arasyndaǵy saýda-ekonomıkalyq yntymaqtastyqty damytý jáne keńeıtý boldy.
Taraptar ózara jetkizilimder qurylymy salystyrmaly túrde shekteýli ekendigin jáne bul olardyń óndirisi men eksporttyq áleýetin kórsetpeıtinin atap ótti. Bul rette eki el ókilderi kezdesýde atalǵan olqylyqtyń ornyn toltyrýǵa qajetti sharalardyń birnesheýin qabyldady. Eki el taýar aınalymyn odan ári damytý maqsatynda áleýetti eksporttyq taýarlar tizimimen almasty.
Kezdesý qorytyndysynda saýda-ekonomıkalyq, ǵylymı-tehnıkalyq jáne mádenıet salasyndaǵy áriptestik boıynsha Qazaqstan-Mońǵolııa úkimetaralyq komıssııasynyń hattamasyna qol qoıyldy. Sondaı-aq mańyzdy kezdesý barysynda Úkimetaralyq komıssııanyń kelesi, ıaǵnı segizinshi otyrysy 2020 jyly Mońǵolııa astanasy Ulan-Bator qalasynda ótetini málim boldy.
Mıras ASAN,
«Egemen Qazaqstan»
